काठमाडाैँ । अन्तरव्यवस्थापिका सङ्घ (आईपीयू) को १५३औँ महासभामा सहभागी हुन तान्जानियाको अरूसा पुगेको नेपाली संसदीय प्रतिनिधिमण्डलले जलवायुजन्य विपद्सम्बन्धी आपत्कालीन एजेन्डाका विषयमा आईपीयू सचिवालयसँग छलफल गरेको छ।

भोटेकोशी र त्रिशूली नदीमा हालै आएको बाढी तथा हिमाली क्षेत्रमा जलवायु परिवर्तनका कारण बढ्दै गएको विपद्को अवस्थालाई दृष्टिगत गर्दै नेपाली प्रतिनिधिमण्डलले ‘Urgent Parliamentary Action to Address Climate-Related Disasters and Strengthen Resilience in the Himalayan Region and Other Vulnerable Regions’ शीर्षकको आपत्कालीन एजेन्डाका विषयमा सचिवालयसँग छलफल गरेको हो।

छलफलमा जलवायुजन्य विपद्बाट प्रभावित तथा जोखिममा रहेका क्षेत्रमा जोखिम न्यूनीकरण, विपद् पूर्वतयारी, उत्थानशीलता अभिवृद्धि तथा अन्तर्राष्ट्रिय संसदीय सहकार्यलाई प्रभावकारी बनाउने विषयमा जोड दिइएको थियो।

नेपालले उक्त आपत्कालीन एजेन्डालाई आईपीयू महासभाबाट पारित गराउन आगामी दिनमा विभिन्न सदस्य राष्ट्रका प्रतिनिधिमण्डलसँग छलफल गरी समर्थनका लागि पहल गर्ने कार्यक्रम तय गरेको छ।

यसैबीच, सभामुख डोलप्रसाद (डीपी) अर्यालको नेतृत्वमा रहेको नेपाली संसदीय प्रतिनिधिमण्डल र अष्ट्रेलियाका सभामुख मिल्टन डिकको नेतृत्वमा रहेको प्रतिनिधिमण्डलबीच द्विपक्षीय भेटवार्ता भएको छ।

भेटवार्तामा नेपाल–अष्ट्रेलिया संसदीय सम्बन्ध, दुवै देशका संसद्बीच अनुभव आदानप्रदान तथा आगामी दिनमा संसदीय सहकार्यलाई थप विस्तार गर्ने विषयमा छलफल भएको सभामुखको सचिवालयले जनाएको छ।