काठमाडौँ । नेकपाका अध्यक्ष पुष्पकमल दाहाल 'प्रचण्ड'ले नेपालको नयाँ नक्सा निकालौँ भन्ने कुरा आफूले नै पार्टीमा र प्रधानमन्त्री केपी ओलीलाई भनेको बताएका छन् ।
आज संसदमा संविधान संशोधनसम्बन्धी विधेयकमाथिको छलफलमा बोल्दै भने– भारतले कश्मिरको जमिन समेटेर नक्सा निकालेपछि अब हाम्रो भूभाग समेटेर नक्सा प्रकाशन गरौँ भन्ने कुरा मैले हाम्रो पार्टीको सचिवालय बैठकमा भनेको थिएँ ।
पछि प्रधानमन्त्रीले पनि आफ्नो कुरालाई मानेको उनले बताए । उनले आफूले नै यो विषय कुनै एक पार्टी, नेता या सरकारको मात्र विषय नभएर सबैको विषय भएकोले यसलाई सर्वदलीय बैठकमा लैजाऔँ भनेको पनि स्मरण गरे ।
तर यो विषय अन्ततः वार्ताको माध्यमबाटै समाधान हुने पनि उनले बताए । उनले भने हामी शान्तिपूर्ण, कूटनैतिक र राजनीतिक सम्वादका माध्यमबाट समाधान चाहन्छौँ तर यसप्रति भारतले पनि सोच्नुपर्छ ।
नेपालीहरु राष्टिय महत्वको मुद्दामा एक ठाउँमा हुन्छन् भन्ने सन्देश हामीहरुले यतिबेला दिएका छौँ भन्दै यस्तो अवस्था भोलिका दिनमा पनि आउने छ भने ।
यो नक्सा जारी गरेपछि अब वार्ताको प्रक्रिया सुरु हुने उनले बताए । उनले यो नेपाली संस्कार हो कि हामी वार्ताबाट नै समाधान खोज्ने छौँ । हामी राष्टिय एकताको साथ यो मुद्धालाई किनारा लगाउने छौँ ।
