हेटौंडा । उज्यालो नेपाल पार्टीका अध्यक्ष कुलमान घिसिङले आगामी प्रदेशसभा निर्वाचनपछि वागमती प्रदेशमा आफ्नो पार्टीको सरकार बन्ने दाबी गर्नुभएको छ ।
मंगलबार हेटौंडामा आयोजित कार्यकर्ता भेला तथा प्रशिक्षण कार्यक्रममा सहभागी अध्यक्ष घिसिङले सञ्चारकर्मीसँग कुरा गर्दै वागमतीमा सरकार गठनका लागि आधार तयार भइसकेको बताउनुभयो । उहाँले वागमती प्रदेशबाट सुरु गर्दै संघीय सरकारको नेतृत्व गर्ने लक्ष्यका साथ पार्टी अघि बढिरहेको दाबी गर्नुभयो ।
अध्यक्ष घिसिङले उज्यालो नेपालको उद्देश्य केवल सत्ता प्राप्ति नभई देशको आर्थिक रूपान्तरण, सुशासन र विभेदको अन्त्य रहेको बताउनुभयो । उज्यालो नेपाल कुनै जाति, धर्म वा समुदाय विशेषको पार्टी नभएको स्पष्ट पार्दै उहाँले आफू तामाङ समुदायमा जन्मिए पनि आफ्नो राजनीतिक दृष्टिकोण जातीय आधारमा नभई समग्र देशको विकास र आर्थिक रूपान्तरणमा केन्द्रित रहेको बताउनुभयो ।
आर्थिक रूपान्तरणका लागि ‘हरित क्रान्ति’लाई मुख्य आधार बनाउनुपर्नेमा जोड दिँदै घिसिङले उज्यालो नेपाल मध्यमार्गी राजनीतिक बाटोबाट अघि बढ्ने बताउनुभयो ।
उहाँले भन्नुभयो, “उज्यालो नेपाल कुनै जाति वा वर्ग विशेषको पार्टी होइन । यो विभेदको अन्त्य, सुशासन र समग्र देशको विकासका लागि स्थापित राजनीतिक शक्ति हो । हामी कुनै वाद–प्रतिवादमा अल्झिनेभन्दा मध्यमार्गी बाटोबाट अघि बढ्दै आर्थिक रूपान्तरणलाई प्राथमिकता दिन्छौँ । हाम्रो आर्थिक रूपान्तरणको मुख्य आधार हरित क्रान्ति हो ।”
अध्यक्ष घिसिङले वर्तमान सरकारले गठन भएको करिब ६ महिनाको अवधिमा जनताको अपेक्षाअनुसार आशा जगाउने गरी काम गर्न नसकेको टिप्पणी गर्नुभयो । जेन–जी आन्दोलनको मर्मअनुसार सरकारले काम गर्नुपर्ने गति हासिल गर्न नसकेको उहाँको भनाइ थियो ।
यद्यपि सरकारलाई अहिल्यै पूर्ण रूपमा असफल भइसकेको निष्कर्षमा पुग्न नहुने उहाँले बताउनुभयो । सरकारले सुशासनका क्षेत्रमा केही काम गर्न खोजेको देखिए पनि त्यसलाई प्रभावकारी रूपमा संस्थागत गर्न नसकेको उहाँको टिप्पणी थियो ।
युवा नेतृत्वमा केही गर्ने इच्छाशक्ति र उत्साह भए पनि अनुभव, विज्ञता र कार्यान्वयन क्षमतासँग जोडेर परिणाममुखी बनाउन आवश्यक रहेको घिसिङले बताउनुभयो ।
यसैगरी, राष्ट्रिय स्वतन्त्र पार्टी (रास्वपा)सँग भएको एकीकरण प्रयास १२ दिनमै टुट्नुमा रास्वपा नेतृत्व जिम्मेवार रहेको उहाँले आरोप लगाउनुभयो । रास्वपासँग एकीकरण गर्ने निर्णय नै उज्यालो नेपालका लागि गलत निर्णय भएको निष्कर्षमा आफूहरू पुगेको उहाँले बताउनुभयो ।
एकीकरण प्रक्रियाका क्रममा उज्यालो नेपालले ठूलो पद वा राजनीतिक भागबन्डाको माग गरेको भन्ने प्रचार गलत भएको घिसिङको दाबी थियो । सहमति गरेर पछि एकतर्फी रूपमा सहमति भङ्ग गर्नु राजनीतिक रूपमा गलत भएको बताउँदै उहाँले त्यसलाई ‘राजनीतिक अपराध’को संज्ञा दिनुभयो ।
अध्यक्ष घिसिङले आगामी स्थानीय तहको निर्वाचनलाई लक्षित गर्दै पार्टीले देशव्यापी रूपमा संगठन विस्तार तथा राजनीतिक गतिविधिलाई तीव्रता दिइरहेको जानकारी दिनुभयो । स्थानीय तहदेखि प्रदेश र संघसम्म पार्टीको उपस्थिति बलियो बनाउँदै देशको नेतृत्व गर्ने लक्ष्यका साथ उज्यालो नेपाल अघि बढिरहेको उहाँको भनाइ थियो ।
