काठमाडौँ । नेपाली कांग्रेसको १५औँ महाधिवेशनअन्तर्गत नयाँ नेतृत्व चयनका लागि उम्मेदवारी दर्ता सुरु भएसँगै निर्वाचन समितिले उम्मेदवारी रुजुका लागि आवश्यक कागजात र प्रक्रिया स्पष्ट गरेको छ।
निर्वाचन समितिका अनुसार उम्मेदवारी दिन इच्छुकले आफूले उम्मेदवारी दिन चाहेको पदअनुसारको फारम पूर्ण रूपमा भरेर बुझाउनुपर्नेछ। फारममा सम्बन्धित पदका लागि तोकिएका महाधिवेशन प्रतिनिधिमध्येबाट प्रस्तावक र समर्थक राख्नुपर्नेछ। उम्मेदवार आफैँ भने आफू उम्मेदवार भएको पदका लागि प्रस्तावक वा समर्थक बन्न पाउने छैनन्।
उम्मेदवारी दर्ताका क्रममा सम्बन्धित पदका लागि तोकिएको शुल्क बुझाएको बैंक भौचर वा रसिदसमेत अनिवार्य रूपमा पेश गर्नुपर्नेछ। बैंक भौचरमा उम्मेदवारको नाम स्पष्ट रूपमा उल्लेख भएको हुनुपर्नेछ।
त्यस्तै, उम्मेदवारले आफू महाधिवेशन प्रतिनिधिमा निर्वाचित भएको प्रमाणपत्र र नेपाल सरकारले जारी गरेको आधिकारिक परिचयपत्रको प्रतिलिपि पनि बुझाउनुपर्नेछ। समावेशी क्लस्टरबाट उम्मेदवारी दिने उम्मेदवारले आफू सम्बन्धित क्लस्टरमा पर्ने प्रमाणित गर्ने प्रमाणपत्रको प्रतिलिपिसमेत पेश गर्नुपर्ने व्यवस्था गरिएको छ।
उम्मेदवारी रुजुका क्रममा क्रियाशील सदस्यताको निरन्तरतासम्बन्धी सम्बन्धित सिफारिससमेत आवश्यक पर्नेछ। उक्त सिफारिस उम्मेदवारी फारमसँगै बुझाउनुपर्ने निर्वाचन समितिले जनाएको छ।
निर्वाचन समितिले उम्मेदवारी दर्ताका क्रममा फारम, प्रस्तावक–समर्थक, शुल्कको भौचर, महाधिवेशन प्रतिनिधि प्रमाणपत्र, आधिकारिक परिचयपत्र, समावेशी क्लस्टरसम्बन्धी प्रमाणपत्र र क्रियाशील सदस्यताको निरन्तरता सिफारिसलगायत आवश्यक सबै कागजात रुजु गर्नेछ।
यससँगै कांग्रेसको केन्द्रीय नेतृत्वका लागि उम्मेदवारी दिन इच्छुकले आवश्यक सम्पूर्ण कागजात पूरा गरेर मात्रै उम्मेदवारी दर्ता गर्नुपर्ने भएको छ।
