काठमाडौँ । जनता समाजवादी पार्टीका अध्यक्ष उपेन्द्र यादवले नेपालको नक्साको चुच्चो कसका पालामा कहाँ हरायो र किन हरायो भन्ने कुराको खोजी गर्नुपर्छ भनेका छन् । उनले महाकाली सन्धी कसरी भयो पारित कसले गर्यो त्यस समयमा किन यो खोजी गरिएन भनेर प्रश्न गरे ।
संसदमा शनिबार सम्बोधन गर्दै उनले भने, हाम्रो पार्टीले अरु कुरामा विवाद होला तर देशभक्ति र राष्ट्रवादमा हामी बलिया छौँ । त्यसैले बहुमतले मात्र होइन हाम्रो पार्टीले यसलाई बहुमतले मात्र होइन कि सर्वसम्मतीले पास गर्ने निर्णय गरेका छौँ ।
प्रमाणहरु संकलन गर्ने भन्दै हिजोमात्र सरकारले एक टिम गठन गरेकोमा उनले आपत्ति गरे । उनले भने आज आएर प्रमाण खोज्नलाई किन टिम बनाएको हो ? यो उल्टो बाटो हिँडेर कहाँ पुगिन्छ ? नौ जना राख्नुभयो अनि मधेशी एकजना पनि परेनन् किन ? के मधेशीले सीमा नै नदेखेका हुन् कि ? संविधान संशोधन हुन लागिसक्यो अनि प्रमाण खोज्न टिम बनाउने ? उनले प्रधानमन्त्रीलाई प्रश्न गरे ।
उनले मधेशीलाई राष्ट्रवादी नदेख्नु नेपाली शासकहरुको नश्लवादी चिन्तन बाहेक केही होइन भने ।