काठमाडौँ । नेपाल क्रिकेट संघ (क्यान) र बिमा कम्पनी मेटलाईफ नेपालबीच सहकार्य हुने भएको छ । क्रिकेटको विकासका लागि गरिने सहकार्यसम्बन्धी सम्झौता पत्रमा बुधबार क्यान र मेटलाइफ नेपालका प्रतिनिधिले हस्ताक्षर गरेका छन् ।
ललितपुरको पुल्चोकस्थित मेटलाइफको मुख्यालयमा भएको सम्झौता अनुसार मेटलाइफ नेपालले पुरुष तथा महिला राष्ट्रिय क्रिकेट टोलीका खेलाडीसँगै क्यानका सदस्यलाई जीवन बिमा र स्वास्थ्य बिमाको सुविधा उपलब्ध गराउनेछ ।
सम्झौता अनुसार बिमित व्यक्तिको दुर्घटनामा मृत्यु भएमा १० लाख रुपैयाँ, दुर्घटनामा घाइते भएमा उपचारको लागि २ लाख रुपैयाँ र बिरामी भई उपचार गराउनुपरेमा १ लाख रुपैयाँसम्मको जोखिम मेटलाइफ नेपालले बहन गर्नेछ ।
