किर स्टार्मरले शुक्रबार पहिलो पटक बेलायतको प्रधानमन्त्रीका रूपमा डाउनिङ स्ट्रिटमा प्रवेश गर्नुभयो र मुलुकको भाग्य पुन:स्थापित गर्नका लागि तत्काल कारबाही चाल्ने वाचा गर्नुभयो ।
ऋषि सुनकको कन्जरभेटिभहरूको १४ वर्षको शासन अन्त्य गर्दै लेबर पार्टीका नेता स्टार्मरले आम निर्वाचनमा भारी जित हासिल गर्नुभएको छ ।
राष्ट्रप्रमुख राजा चार्ल्स तृतीयको सरकार गठनको अनुरोध स्वीकार गर्दै उहाँले डाउनिङ स्ट्रिटबाहिर पत्रकारहरूलाई भन्नुभयो, “परिवर्तनको काम तुरुन्त सुरु हुन्छ तर हामी बेलायतको पुनर्निमाण गर्नेछौँ भन्नेमा कुनै सन्देह नगर्नुहोस् ।”
एकसठ्ठी वर्षीय पूर्वमानवअधिकार वकिल प्रमुख राज्य अभियोजक स्टार्मरले सुनकलाई धन्यवाद दिनुभयो । सुनकलाई लिज ट्रसको विनाशकारी कार्यकालपछि सन् २०२२ अक्टोबरमा टोरी नेता तथा प्रधानमन्त्रीमा नियुक्त गरिएको थियो ।
“हाम्रो मुलुकको पहिलो ब्रिटिस–एसियाली प्रधानमन्त्रीका रूपमा उहाँको उपलब्धि, त्यसका लागि आवश्यक पर्ने अतिरिक्त प्रयासलाई कसैले पनि कम आँक्नु हुँदैन”, उहाँले भन्नुभयो, “हामी आज उहाँलाई धन्यवाद दिन्छौँ, हामी उहाँको नेतृत्वमा गरिएको समर्पण र कडा परिश्रमलाई पनि मान्यता दिन्छौँ ।”
स्टार्मर र उहाँकी श्रीमती भिक्टोरिया बकिङ्घम प्यालेस आइपुग्दा झन्डा फहराउँदै डाउनिङ स्ट्रिटतर्फ उभिएका लेबर समर्थकहरूलाई उहाँहरूले हात मिलाउँदै चुम्नुभयो ।
बेलायतीहरू घट्दो सार्वजनिक सेवाहरू, उच्च मूल्य र राजनीतिज्ञहरूका कोरा प्रतिज्ञाहरूबाट थाकेको अवस्थामा स्टार्मरले डरलाग्दो कार्यसूचीको सामना गर्नुपरेको छ ।
उहाँले भन्नुभयो, “सरकारले ‘देश पहिला, पार्टी दोस्रो’ राख्नेछ ।” सार्वजनिक विश्वासलाई घटाएका टोरीजअन्तर्गतका स्क्यान्डलहरूको उत्तराधिकारपछि उहाँले ‘राजनीतिको सम्मान’ पुन:स्थापित गर्ने वाचा गर्नुभयो ।
यद्यपि उहाँले तत्काल रूपान्तरणको उच्च अपेक्षामाथि काबु पाउने प्रयास गर्नुभयो । “कुनै पनि मुलुकलाई परिवर्तन गर्न स्विच दबाएजस्तो हुँदैन”, उहाँले भन्नुभयो, “संसार अहिले धेरै अस्थिर ठाउँ भएको छ, यसमा थोरै समय लाग्नेछ तर रूपान्तरणको काम तुरुन्त सुरु हुनेछ भन्नेमा कुनै शङ्का नगर्नुहोस् ।” रासस
