एजेन्सी । च्याम्पियन्स लिगको सेमिफाइनल खेल अन्तर्गत पहिलो चरणमा इंग्लिस क्लब म्यान्चेस्टर सिटीले स्पेनिस क्लब रियल मड्रिडविरुद्ध रोमाञ्चक जित निकालेको छ ।
मंगलबार राति भएको खेलमा सिटीले घरेलु मैदान इतिहाडमा रियललाई ४–३ गोलले पराजित गरेको हो । खेलको दोस्रो मिनेटमा नै सिटीले केभिन डी ब्रुएनाको गोलबाट सुरुवाती अग्रता बनाएको थियो ।
११ औं मिनेटमा गाब्रियल जिससले गोल गर्दै सिटीको अग्रता दोब्बर पारे । ३३ औं मिनेटमा करिम बेन्जेमाले गोल गर्दै रियललाई २–१ को स्थितीमा ल्याए । ५३ औं मिनेटमा फिल फोडेनले गोल गर्दा सिटी ३–१ को अवस्थामा रह्यो ।
तर, ५५ औं मिनेटमा भिनिसियस जुनियरले गोल गर्दै रियललाई ३–२ को अवस्थामा ल्याए । उता, बर्नार्डो सिल्भाले गोल गर्दै सिटीलाई ४–२ गोलको अग्रता दिलाए ।
८२ औं मिनेटमा रियलले पेनाल्टी पायो । कप्तान बेन्जेमाले व्यक्तिगत दोस्रो तथा टिमका लागि तेस्रो गोल गर्दै खेललाई ४–३ को अवस्थामा पुर्याए ।
अब यी दुईटीमबीच दोस्रो चरणको खेल मे ५ मा हुनेछ ।
