आदरणीय नेपाली कांग्रेसका पूर्वसभापति शेरबहादुर देउवाज्यू,
सादर प्रणाम ।
यो पत्र लेख्दा मन अत्यन्तै सम्मान, कृतज्ञता र अलिकति चिन्ताले भरिएको छ । तपाईंको राजनीतिक यात्रा केवल व्यक्तिगत उन्नतिको कथा होइन, नेपाली कांग्रेसको संघर्ष, उतार–चढाव र लोकतान्त्रिक आन्दोलनको जीवित इतिहास पनि हो । विद्यार्थी जीवनदेखि शुरू भएको तपाईँको संघर्ष, जेल–नेल, आन्दोलन, चोटपटक, परिवारसहितको पीडा—यी सबै घटनाहरूले तपाईंलाई केवल नेता मात्र होइन, संस्थाजस्तै व्यक्तित्व बनाएको छ ।
पार्टीका विभिन्न तह हुँदै सभापति बन्नु, पटक–पटक सांसद, गृहमन्त्री र प्रधानमन्त्रीको जिम्मेवारी सम्हाल्नु यो पदको निरन्तरता मात्र नभएर विश्वासको निरन्तरता हो । बहुमतको निर्णय स्वीकार गर्ने संस्कार, संस्थागत प्रक्रियामा आस्था र संकटका बेला पार्टीलाई समेट्ने धैर्य जस्ता गुणहरूले तपाईंलाई परिपक्व लोकतान्त्रिक नेताका रूपमा स्थापित गरेका छन् ।
तर, आजको वर्तमान भने यसबाट केही फरक देखिन्छ । पार्टी नयाँ पुस्ताको नेतृत्वमा प्रवेश गरिरहेको छ । पुस्तान्तरण स्वाभाविक प्रक्रिया हो, तर अनुभव र ऊर्जा सँगै नहिँडे त्यो संक्रमण अधुरो रहन्छ । अहिले कार्यकर्ताको मनमा एउटा मिहिन प्रश्न उठिरहेको छ— पुराना, अनुभवी, संघर्षका साक्षी नेताहरू किन अलि निस्क्रियजस्ता देखिनुहुन्छ ? के यो मौनता रणनीति हो या समयले थकान ल्याएको संकेत ?
हामीले बुझेका देउवाज्यू भनेको संकटमा अगाडि उभिने नेता हो । पार्टी कमजोर देखिँदा समेट्ने, विभाजन हुँदा जोड्ने, निराशा छाउँदा धैर्य दिने व्यक्तित्व हो । त्यसैले आज जब पार्टी पुन: एक निर्णायक मोडमा छ, तपाईंको सक्रिय उपस्थिति झन् आवश्यक भएको छ ।
गगन थापा जस्ता नेताहरू तपाईंको राजनीतिक यात्राकै निरन्तरता हुन् । तपाईंले अवसर दिनुभएको पुस्ता आज नेतृत्वमा पुगेको छ भने त्यो तपाईँको योगदानकै परिणाम हो । यस्तो अवस्थामा तपाईंको खुलेर साथ, मार्गदर्शन र संरक्षणले पार्टीलाई सन्देश दिन्छ—कांग्रेस केवल पुस्ता बदलिएको होइन, अझ बलियो भएको छ ।
विगतले तपाईंलाई इतिहासमा स्थान दिएको छ । वर्तमानले तपाईंलाई जिम्मेवारी सम्झाइरहेको छ । भविष्यले तपाईंलाई एकता र हस्तान्तरणको उदाहरण बन्न आह्वान गरिरहेको छ ।
देश जटिल परिस्थितिमा छ । लोकतन्त्रप्रति चुनौतीहरू छन् । यस्तो बेला कांग्रेस कमजोर देखिनु भनेको लोकतान्त्रिक मूल्यमाथि प्रश्न उठ्नु हो । हामी जस्ता हजारौं कार्यकर्ता अझै तपाईंको सक्रियता, तपाईंको आवाज, तपाईंको स्पष्ट समर्थनको प्रतीक्षा गरिरहेका छौं ।
हामीलाई थाहा छ तपाईंले पाउन बाँकी केही छैन । तर दिन बाँकी अझै धेरै छ । अनुभव, सन्तुलन, सहमतिको कला र संस्थागत मर्यादाको शिक्षा—यी सबै अझै पार्टीलाई आवश्यक छन् ।
आदरणीय नेता, यो समय इतिहास लेख्ने अर्को अवसर पनि हुन सक्छ । सक्रिय साथ दिएर, पुस्तान्तरणलाई सहज बनाउँदै, पार्टीलाई जिताउने अभियानमा अग्रसर भएर तपाईंले आफ्नो राजनीतिक जीवनको सबैभन्दा सुन्दर अध्याय थप्न सक्नुहुन्छ ।
हामी प्रतीक्षामा छौं—आशासहित, सम्मानसहित र विश्वाससहित ।
लोकनाथ अधिकारी -हाल अमेरिका
