काठमाडौं । लागूऔषध नियन्त्रण ब्यूरो कोटेश्वरले खैरो हेरोइनसहित दुई जनालाई पक्राउ गरेको छ। ब्यूरोका अनुसार उनीहरूलाई कागेश्वरी मनहरा नगरपालिका–६ बाट पक्राउ गरिएको हो।
लागूऔषधको कारोबारमा संलग्न हुन सक्ने गिरोहको निगरानी गर्ने क्रममा भदौ २ गते खटिएको प्रहरी टोलीले लागूऔषध खैरो हेरोइन खरिद–बिक्री गरिरहेको अवस्थामा उनीहरूलाई पक्राउ गरेको हो।
पक्राउ पर्नेमा दोलखाको शैलुङ नगरपालिका–८ का २५ वर्षीय सविन कार्की र सप्तरीको शम्भुनाथ नगरपालिका–७ का ४१ वर्षीय अजय दास रहेका छन्।
प्रहरीले उनीहरूको साथबाट ३२.५८० ग्राम खैरो हेरोइन, नेपाली नगद ४ लाख रुपैयाँ, दुई थान डिजिटल तराजु र दुई थान मोबाइल बरामद गरेको जनाएको छ।
पक्राउ परेका दुवै जनामाथि लागूऔषधसम्बन्धी कसुरमा थप अनुसन्धान भइरहेको लागूऔषध नियन्त्रण ब्यूरोले जनाएको छ।
