काठमाडौँ, असोज ४: राष्ट्रिय स्वतन्त्र पार्टी (रास्वपा)ले जनप्रतिनिधिलाई मतदाताप्रति थप जवाफदेही र उत्तरदायी बनाउने संयन्त्रका रूपमा ‘राइट टु रिकल’ अवधारणालाई अघि बढाउने भएको छ।
रास्वपाको ‘राइट टु रिकल’ सम्बन्धी दस्तावेज निर्माण समितिको पहिलो बैठक आज पार्टीको केन्द्रीय कार्यालयमा महामन्त्री तथा समितिका संयोजक विपिनकुमार आचार्यको अध्यक्षतामा बसेको हो।
बैठकमा ‘राइट टु रिकल’ अवधारणासम्बन्धी बहसलाई थप विस्तार गर्ने तथा त्यससम्बन्धी दस्तावेज तयार गर्ने विषयमा छलफल भएको पार्टीले जनाएको छ। उक्त अवधारणाले निर्वाचित जनप्रतिनिधिलाई मतदाताप्रति थप जवाफदेही बनाउने र लोकतान्त्रिक निर्वाचन प्रणालीप्रति मतदाताको विश्वास अभिवृद्धि गर्ने विषयमा बैठक केन्द्रित थियो।
बैठकले समितिको सचिवको जिम्मेवारी मनिष खनाललाई दिने निर्णय गरेको छ। साथै, विभिन्न विषयमा अध्ययन तथा समन्वयका लागि चारवटा उपसमिति गठन गरिएको छ।
संवैधानिक तथा सम्बन्धित कानुनी प्रावधान अध्ययन समितिमा सुलभ खरेल र गजला शमिम मिकरानी, अन्तर्राष्ट्रिय प्रचलित अभ्यास अध्ययन समितिमा अनुष्का श्रेष्ठ, सरोकारवालासँगको छलफल समन्वय समितिमा समीक्षा बास्कोटा र करिस्मा कठरिया तथा सञ्चार तथा मिडिया समन्वय समितिमा प्रमोद न्यौपानेलाई जिम्मेवारी दिइएको छ।
रास्वपाले ‘राइट टु रिकल’लाई आफ्नो प्राथमिकताका मुद्दामध्ये एकका रूपमा अघि बढाउँदै आएको जनाएको छ।
