काठमाडौँ। काठमाडौँ महानगरपालिकाको स्वास्थ्य विभागले आफू अन्तर्गत नियमित खोप सेवा सञ्चालन हुने स्वास्थ्य संस्थामा कार्यरत स्वास्थ्यकर्मीका लागि खोप सम्बन्धी ५ दिने तालिम सम्पन्न गरेको छ ।
तालिमको पहिलो ब्याचमा सहरी स्वास्थ्य प्रवर्धन केन्द्रको नियमित खोप सेवामा सम्लग्न स्वास्थ्यकर्मी सहभागी हुनुहुन्थ्यो । खोपको पहुँचमा वृद्धि, खोप सेवाको सुदृढीकरण, खोप कार्यक्रमका लागि तथ्याङ्कको प्रयोग, खोप खेर जाने दरमा सुधार ल्याउने उद्देश्यले तालिम सञ्चालन गरिएको हो ।
आफ्नो भौगोलिक क्षेत्रभित्र रहेका नियमित खोप सञ्चालन गर्ने सरकारी तथा निजी स्वास्थ्य संस्थाहरुको खोप सेवा सुक्ष्म कार्ययोजना तयार पारेपछि तालिम सञ्चालन गरेको हो ।
तालिम समापन गर्दै स्वास्थ्य विभागका प्रमुख दिपककुमार के. सी. ले, गुणस्तरीय स्वास्थ्य सेवा कायम गराउन स्वास्थ्यकर्मीहरुको क्षमता विकासका कार्यक्रममा जोड दिइएको बताउनुभयो । स्वास्थ्य कार्यालयका निमित्त प्रमुख प्रबिना कर्माचार्यले, तालिममा सिकेको ज्ञान र सिप सेवामा प्रतिबिम्बित हुनु पर्ने बताउनुभयो ।
हामीले स्वास्थ्य सेवा स्वीकार गरेर पेशा छानेका हौँ । त्यसैले व्यक्तिगतभन्दा सेवा व्यवस्थापनमा जोड हुनुपर्ने स्वास्थ्य महाशाखा प्रमुख नःलि बज्राचार्यको जोड थियो ।
खोप सम्बन्धी सेवा, खोप सेवासँग सम्बन्धित व्यवस्थापकीय क्षमता, लक्षित जनखंख्या निर्धारण, अभिलेख तथा रिपोर्टिङ र खोपको निरन्तरता, कानुनी व्यवस्था, खोप पछिका जोखिम व्यवस्थापन जस्ता विषय तालिममा समावेश थिए । खोप कार्यक्रमकी फोकल पर्सन मैयाँ सैँजुका अनुसार यस प्रकारको वृहत तालिम पहिलो पटक प्रदान गरिएको हो । यस अन्तर्गत पहिलो व्याचमा २१ जना स्वास्थ्यकर्मी सहभागी हुनुहुन्थ्यो । दोस्रो चरणमा १९ जनालाई तालिम प्रदान गरिनेछ ।
तालिममा खोपबाट बचाउन सकिने रोगहरुको सर्वेक्षण, खोप नपाएका तथा बिचैमा खोप लगाउन छाडेका बालबालिकाको पहिचान, नियमित खोप सत्रको समीक्षा लगायत विषयमा ज्ञान प्रदान गरिएको प्रशिक्षक पार्थमणि न्यौपानेले जानकारी दिनुभयो ।
स्वास्थ्यकर्मी र महिला स्वास्थ्य स्वयंसेविकासँग समन्वय, खोप आपूर्ति तथा चिस्यान श्रृृङ्खला (कोल्ड चेन), खोप सामग्रीको आवश्यकता निर्धारण र नियमित अनुगमन, खोप सेवाबाट वञ्चित क्षेत्र, वर्ग तथा समुदाय पहिचान गर्ने र सेवा सञ्चालन गर्ने विषय समावेश थिए ।
सहरी स्वास्थ्य प्रवर्धन केन्द्र वडा नं. १८ का इञ्चार्ज यशोदा खत्रीले तालिमबाट आफूहरुलाई प्रयोग भइरहेको अभ्यासलाई अद्यावधिक गर्न सहयोग पुगेको धारणा राख्नुभयो ।
