एजेन्सी । इंग्लिस प्रिमियर लिग फुटबल अन्तर्गत लिभरपुलले सानदार जित निकालेको छ । मंगलबार मध्यरातमा भएको खेलमा लिभरपुल म्यान्चेस्टर युनाइटेडविरुद्ध ४–० गोलले विजयी बन्दै अंकतालिकाको शीर्ष स्थानमा उक्लिएको हो ।
घरेलु मैदान एनफिल्डमा लिभरपुललाई जित दिलाउन मोहम्मद सलाहले दुई गोल गरे भने लुईस डियाज र साडियो मानेले एक–एक गोल गरे ।
खेलको पाँचौं मिनेटमा नै लिभरपुलले डियाजको गोलबाट अग्रता बनाएको थियो । २२ औं मिनेटमा सलाहले गोल गर्दै अग्रता दोब्बर पारे । यस्तै, ६८ औं मिनेटमा मानेले गोल गर्दै लिभरपुललाई ३–० को स्थितीमा पुर्याए । ८५ औं मिनेटमा सलाहले व्यक्तिगत दोस्रो गोल गर्दै लिभरपुललाई सानदार जित दिलाए ।
लिभरपुलले ३२ खेलबाट ७६ अंक जोडेको छ । एक खेल कम खेलेको म्यान्चेस्टर सिटी ७४ अंकसहित दोस्रो स्थानमा रहेको छ । यस्तै, ३३ खेलबाट युनाइटेड ५४ अंकसहित छैटौं स्थानमा रहेको छ ।
