काठमाडौं । नेकपा महासचिव एवं सांसद विष्णुप्रसाद पौडेलले नेपालको भूमि फिर्ता ल्याउन गरिएको प्रयास कसैको बिरुद्ध नभएको स्पष्ट पार्नुभएको छ ।
शनिबार प्रतिनिधिसभा बैठकमा संविधान संशोधन सम्बन्धी प्रस्ताव माथिको छलफलमा भाग लिँदै उहाँले भूगोलको आधारमा मुलुक ठूलो र सानो नहुने भन्दै भारतसँग सम्बन्ध विगार्न नभै नयाँ उचाईको सम्बन्ध कायम गर्न यो निर्णयले सहज हुने बताउनु भयो ।
सांसद पौडेलले कालापानी, लिपुलेक र लिम्पियाधुरा क्षेत्रमा हक स्थापित गर्छाैं भन्दै गर्दा अनेका आशंका उब्जिएको स्मरण गर्दै आशंकाको जवाफ व्यवहारबाट दिने हिसाबले काम गरिरहेको स्पष्ट पार्नुभयो । उहाँले यो निर्णय कसैको बिरुद्धको नभएको उल्लेख गर्दै नेपालको यो निर्णयले भारतसँगको सम्बन्ध बिग्रने छ भन्ने कोणबाट टिप्पणी गलत भएको बताउनु भयो ।
नेपाल र नेपालीको पक्षमा गरिएको निर्णयलाई लिएर कसैले पनि लधुताभाष राख्न जरुरी नरहेको भन्दै सांसद पौडेलले हाम्रो भूमिमा हाम्रो अधिकार स्थापित गरेर जाँदा दुई छिमेकी देशसँग सम्बन्ध राम्रो हुने स्पष्ट पार्नुभयो ।
उहाँले यो ऐतिहासिक कार्यका लागि प्रधानमन्त्री केपी ओलीको नेतृत्वको सरकार र र सम्पूर्ण राजनीतिक दल र आम नागरिकलाई बधाई तथा शुभकामना समेत दिनुभयो ।
