काठमाडाैंः नेपाल सरकारले लिम्पियाधुरा, लिपुलेक र कालापानीको भूभागलाई समावेश गरेको नयाँ नक्सा निसान छापमा समेट्न शनिबार गरेको संविधान संशोधनप्रति भारतले पुनः असहमति जनाएको छ । सीमा विवादलाई वार्ताबाट हल गर्ने दुबै देशबीचकाे समझदारीको नेपालले उल्लघंन गरेको भारतले प्रतिक्रिया दिएको छ ।
संविधान संशोधन विधेयक प्रतिनिधिसभाबाट दुइ तिहाइभन्दा बढी मतले पारित गरेलगत्तै भारतीय विदेश मन्त्रालयका तर्फबाट त्यस्तो प्रतिक्रिया आएको हो । ‘नेपालको संसदले भारतको भूभाग समावेश गरिएको नयाँ नक्साका लागि संविधान संशोधन विधेयक पारित भएको घटनालाई हामीले चासोका साथ हेरेका छौं र यसले दुवै देशबीच सीमासम्बन्धी विवादित मुद्दालाई वार्ताद्वारा सुल्झाउने समझदारीको उल्लघंन भएको छ’ विदेश मन्त्रालयका प्रवक्ता अनुराग श्रीवास्तवद्वारा जारी विज्ञप्तिमा भनिएको छ ।
त्यसैगरी कृत्रिम तरिकाले भूभागको विस्तार ऐतिहासिक तथ्य र प्रमाणमा आधारित नभएकाले उक्त नक्सा मान्य नभएको समेत भारतको भनाइ छ । ‘ऐतिहासिक तथ्य र प्रमाणबिना कृत्रिम तरिकाले भूभागको विस्तार गर्नु मान्य छैन,’ श्रीवास्तवले भनेका छन् ।