एजेन्सी । इजरायल र हमासबीच एक साता लामो युद्धविरामपछि फेरि युद्ध सुरु भएको छ । टाइम्स अफ इजरायलका अनुसार आईडीएफले गाजामा बमबारी सुरु गरेको छ ।
इजरायलको होलित क्षेत्रमा रकेट अलर्ट जारी गरिएको छ । आइडीएफले हमासमाथि युद्धविराम उल्लंघन गरेको आरोप लगाएको छ । कतारी मिडिया हाउस अल जजिराका अनुसार इस्लामिक जिहादको सैन्य शाखा अल कुद्सले बिहानै इजरायलका धेरै सहरमा आक्रमण गरेको थियो । आक्रमणका कारण इजरायलले उत्तरी इजरायलका २ वटा राजमार्ग बन्द गरेको छ । साथै सीमावर्ती क्षेत्रमा खेतीपाती गर्न पनि रोक लगाइएको छ ।
इजरायली सेनाले गाजाका जनतालाई खान युनिस क्षेत्र खाली गर्न पनि आदेश दिएको छ । यसका लागि अरबी भाषामा लेखिएका पर्चाहरू हटाइएका छन् । यसैबीच हमासले इजरायलले रफाह नजिकै बिहान बमबारी गरेको बताएको छ । जसमा दर्जनौं प्यालेस्टाइनीको मृत्यु भएको थियो । बीबीसीका अनुसार युद्धविराम भएको ३ घण्टाभित्र ३२ प्यालेस्टाइनी मारिएका छन् । जसमा महिला र बालबालिका पनि छन् ।
इजरायली प्रधानमन्त्री बेन्जामिन नेतान्याहुले हमासले थप बन्धकहरूलाई रिहा गर्न नचाहेको बताएका छन् । जसका कारण युद्धविराम थप लम्ब्याउन सकिएको छैन । हमासले पनि सबै महिलालाई रिहा गरेन र इजरायलमा रकेट प्रहार गर्न थाले ।
अक्टोबर ७ मा सुरु भएको युद्धमा इजरायलमा १२ सय र गाजामा १४ हजारभन्दा बढीको मृत्यु भएको छ । युद्धविराम सकिएपछि अमेरिकी विदेशमन्त्री एन्टोनी ब्लिन्केन इजरायल प्रस्थान गरेका छन् ।
हमासले ७ दिने युद्धविराममा ११० इजरायलीलाई रिहा गरेको छ । युद्धविरामको अन्तिम दिन ८ जना इजरायली बन्धकलाई मुक्त गरिएको थियो । तीमध्ये दुई महिलालाई बिहीबार दिउँसो रिहा गरिएको थियो । ६ जना बन्धकलाई साँझ रिहा गरिएको थियो । बदलामा इजरायलले ३० प्यालेस्टिनीलाई रिहा गरेको थियो । जसमा २२ बालबालिका र ८ महिला रहेका छन् ।
