एजेन्सी । स्ट्रेलियाका महान् क्रिकेट खेलाडी सर डोनाल्ड (डन) ब्रेडम्यानको “बैगी ग्रीन टोपी” हालै नीलामी मार्फत बिक्री गरिएको छ। गोल्ड कोस्ट मा सम्पन्न नीलामीमा एक नाम नखुलाइएको खरिदकर्ता ले यो टोपी चार लाख साठी हजार अस्ट्रेलियाली डलर (४ करोड ६२ लाख) तिरेर किनेका हुन्।

यो त्यही टोपी हो, जुन ब्रेडम्यानले सन् १९४७–४८ मा स्वतन्त्र भारतविरुद्ध खेलिएको पहिलो टेस्ट खेल श्रृंखलाका क्रममा लगाएका थिए।

ब्रेडम्यानले यो टोपी आफ्नो अन्तिम घरेलु टेस्ट खेल श्रृंखला (१९४७–४८) पछि भारतीय टोलीका प्रारम्भिक बलर श्रीरंगा सोहनी (एस. डब्ल्यु. सोहनी) लाई उपहारस्वरूप दिएका थिए। सोहनी परिवारले यो टोपी करिब ७५ वर्षसम्म सुरक्षित राख्यो र यसलाई कहिल्यै सार्वजनिक रूपमा प्रदर्शन गरेन।

लयड्स नीलामी संस्थाका मुख्य सञ्चालन अधिकृत ली हेम्स ले यस टोपीलाई “क्रिकेट संसारको सबैभन्दा अमूल्य सम्पत्ति” भनेर वर्णन गरेका छन्। उनले भने, “यो टोपी तीन पुस्तासम्म ताल्चा लगाएर राखिएको थियो। परिवारको नियमअनुसार, परिवारको कुनै सदस्य १६ वर्ष पुगेपछि मात्र उसलाई पाँच मिनेटका लागि मात्र यो टोपी हेर्न अनुमति दिइन्थ्यो।”

श्रीरंगा सोहनीले फालेका थिए स्वतन्त्र भारतको पहिलो बल

भारतीय क्रिकेट खेलाडी श्रीरंगा सोहनीले १९४७–४८ को श्रृंखला मा केवल पहिलो टेस्ट खेल मात्र खेलेका थिए। यद्यपि उनले कुनै विकेट लिन सकेनन्, तर उनले उक्त खेलको पहिलो बल फालेका थिए। यही बल स्वतन्त्र भारतको क्रिकेट इतिहासको पहिलो बल थियो। यही खेलपछि ब्रेडम्यानले सम्झनास्वरूप आफ्नो टोपी सोहनीलाई दिएका थिए।

टोपीभित्र दुवै महान् खेलाडीका नाम

यो विशेष टोपीको भित्रपट्टि डोनाल्ड जर्ज ब्रेडम्यान र श्रीरंगा वासुदेव सोहनीका नाम लेखिएका छन्। टोपीमा अस्ट्रेलियाली राष्ट्रिय प्रतीकको तल “१९४७–४८” पनि कढाइ गरिएको छ। क्रिकेट संसारमा ब्रेडम्यानका यस्ता केवल ११ वटा बैगी ग्रीन टोपीहरूको मात्र जानकारी उपलब्ध छ, किनकि त्यस समय खेलाडीहरूले हरेक श्रृंखलाका लागि फरक टोपी प्रयोग गर्थे।

शेन वार्नको टोपी सबैभन्दा महँगो

नीलामी इतिहासमा सबैभन्दा महँगो बैगी ग्रीन टोपीको कीर्तिमान दिग्गज स्पिन बलर शेन वार्न को नाममा छ। सन् २०२० मा वार्नको टोपी करिब ९ करोड ४४ लाख (दस लाख अस्ट्रेलियाली डलर) मा बिक्री भएको थियो।

उक्त रकम वन डढेलो पीडित सहायता कोषमा दान गरिएको थियो। त्यस्तै, ब्रेडम्यानको सन् १९२८ को पहिलो अन्तर्राष्ट्रिय खेलको टोपी सन् २०२० मै करिब चार करोड पच्चीस लाख रुपैयाँमा बिक्री भएको थियो।

भारतविरुद्ध ब्रेडम्यानको कीर्तिमान

१९४७–४८ को ऐतिहासिक टेस्ट खेल श्रृंखलामा भारतले अस्ट्रेलियासँग ०–४ ले पराजय बेहोर्नुपरेको थियो। डन ब्रेडम्यानले उक्त श्रृंखलामा उत्कृष्ट ब्याटिङ गर्दै १७८ दशमलव ७५ को औसतमा ७१५ रन बनाए, जसमा तीन शतक समावेश थिए।