काठमाडौं । नेपाली कांग्रेसका नवनिर्वाचित महामन्त्री प्रदीप पौडेलले पार्टीलाई बलियो, गतिशील र एकताबद्ध बनाउने अभियानमा समर्पित भएर लाग्ने प्रतिबद्धता व्यक्त गर्नुभएको छ ।
महामन्त्रीको जिम्मेवारी प्रदान गरेकोमा १५औँ महाधिवेशनका सम्पूर्ण प्रतिनिधि, आम मतदाता तथा शुभचिन्तकप्रति आभार व्यक्त गर्दै पौडेलले आफूहरूमाथि व्यक्त गरिएको विश्वासलाई राजनीतिक जीवनको सबैभन्दा ठूलो पुँजीका रूपमा लिएको बताउनुभएको हो ।
उहाँले आगामी राजनीतिक यात्रामा सबैको साथ र सल्लाह–सुझावलाई आत्मसात् गर्दै पार्टी निर्माणको अभियानमा अघि बढ्ने उल्लेख गर्नुभएको छ ।
पौडेलले १५औँ महाधिवेशनमा अभिव्यक्त मतले कांग्रेसका नेता तथा कार्यकर्ता एकताबद्ध भएर अघि बढ्नुपर्ने स्पष्ट सन्देश दिएको बताउनुभएको छ । आन्तरिक प्रतिस्पर्धालाई लोकतन्त्रको सुन्दर अभ्यासका रूपमा लिँदै विगतका तिक्तता बिर्सेर भावनात्मक रूपमा समेत एकजुट भएको बलियो कांग्रेस निर्माण गर्नुपर्ने उहाँको भनाइ छ ।
मुलुकका जटिल समस्या समाधानमा नेपाली कांग्रेसले विगतमा खेलेको ऐतिहासिक भूमिकाको स्मरण गर्दै पौडेलले वर्तमान राजनीतिक तथा आर्थिक चुनौती सामना गर्न सक्ने समयसापेक्ष पार्टी निर्माण गर्नुपर्नेमा जोड दिनुभएको छ ।
उहाँले नेपाली कांग्रेसलाई आम नागरिकको सुखदुःखको साथी बनाउँदै जनजीविका र लोकतन्त्रको रक्षा गर्ने गतिशील, जनमुखी तथा भरोसायोग्य राजनीतिक शक्तिका रूपमा रूपान्तरण गर्नु अबको मुख्य आवश्यकता रहेको बताउनुभएको छ ।
महाधिवेशन सफल बनाउन अहोरात्र खटिने सबैप्रति धन्यवाद व्यक्त गर्दै पौडेलले पार्टीभित्रको एकता र सहकार्यलाई सुदृढ बनाएर अघि बढ्नुपर्ने सन्देश दिनुभएको छ ।
