विभागले श्रम ऐन, २०७४ को दफा ३७ मा रहेको कानुनी व्यवस्थाको प्रभावकारी कार्यान्वयन सुनिश्चित गर्न निजी क्षेत्रका नेतृत्वदायी संस्थाहरूलाई पत्राचार गर्दै यस्तो निर्देशन दिएको हो।
श्रम ऐन, २०७४ को दफा ३७ अनुसार प्रचलित धर्म, संस्कृति तथा परम्पराअनुसार मनाइने चाडपर्वका लागि प्रत्येक श्रमिकले आफूले खाइपाइ आएको एक महिनाको आधारभूत पारिश्रमिक बराबरको रकम प्रत्येक वर्ष चाडपर्व खर्चका रूपमा पाउने कानुनी व्यवस्था छ।
यसै व्यवस्थाको कार्यान्वयनका लागि विभागले २०८३ असोज २३ गते नेपाल उद्योग वाणिज्य महासंघ (एफएनसीसीआई), नेपाल उद्योग परिसंघ (सीएनआई) र नेपाल चेम्बर अफ कमर्स (एनसीसी) लाई पत्राचार गरेको थियो। विभागले ती संस्थालाई आफ्ना आबद्ध रोजगारदाता तथा प्रतिष्ठानहरूलाई कानुनी व्यवस्थाबारे जानकारी गराई श्रमिकलाई चाडपर्व खर्च भुक्तानी गर्ने व्यवस्था मिलाउन निर्देशन दिएको हो।
त्यस्तै, विभागले २०८३ असोज २६ गते निजी तथा आवासीय विद्यालय अर्गनाइजेसन नेपाल (प्याब्सन) र राष्ट्रिय निजी तथा आवासीय विद्यालय एसोसिएसन नेपाल (एन-प्याब्सन) लाई पनि छुट्टै पत्राचार गरेको छ। निजी विद्यालयमा कार्यरत शिक्षक तथा कर्मचारीले कानुनबमोजिम पाउनुपर्ने चाडपर्व खर्च सुनिश्चित गर्न विभागले दुवै संस्थालाई पत्राचार गरेको हो।
विभागको यो कदमले निजी क्षेत्रका उद्योग, व्यवसाय तथा शैक्षिक संस्थामा कार्यरत श्रमिक, शिक्षक र कर्मचारीले कानुनले सुनिश्चित गरेको चाडपर्व खर्च प्राप्त गर्ने व्यवस्था प्रभावकारी बनाउन सहयोग पुग्ने अपेक्षा गरिएको छ।
