काठमाडौं । विभिन्न १३ देशका लागि प्रस्तावित नेपाली राजदूतविरुद्ध परेका उजुरीमाथि सुनुवाइ प्रक्रिया अघि बढाउन संसदीय सुनुवाइ विशेष समितिलाई चुनौती थपिएको छ । उजुरीमाथि छलफल गर्न बोलाइएको बैठकमा अधिकांश उजुरीकर्ता अनुपस्थित भएपछि समितिलाई थप प्रक्रिया अघि बढाउने विषयमा छलफल गर्नुपरेको हो ।
१३ देशका लागि प्रस्तावित राजदूतविरुद्ध चार जनाले सातवटा उजुरी दिएका छन् । तर, उजुरीमाथि छलफल गर्न बोलाइएको बैठकमा अधिकांश उजुरीकर्ता उपस्थित भएनन् ।
समितिका सभापति बोधनारायण श्रेष्ठका अनुसार जापानका लागि प्रस्तावित राजदूत ज्ञानकुमार थापा र साउदी अरबका लागि प्रस्तावित राजदूत गिरिबहादुर सुनारविरुद्ध उजुरी दिने व्यक्तिहरू सम्पर्कमा आएका छैनन् । समितिले पटक–पटक प्रयास गर्दा पनि उनीहरू सम्पर्कमा नआएपछि यस विषयमा समितिले चासो व्यक्त गरेको छ ।
यस्तै, भारतका लागि प्रस्तावित राजदूत निश्चलनाथ पाण्डेविरुद्ध उजुरी दिने दीपा भण्डारीले भने इमेलमार्फत आफू बैठकमा उपस्थित हुन नसक्ने जानकारी गराएकी छन् । उनले आफू उपस्थित हुन नसके पनि समितिसमक्ष आफ्नो उजुरी पढेर सुनाउन आग्रह गरेकी छन् ।
बैठकमा सार्वजनिक सूचना प्रकाशनको समयसीमाका विषयमा समेत छलफल भएको थियो । कानुनी व्यवस्थाअनुसार बिदाको दिनपछि सूचना गणना गर्दा प्रभावकारी समय कम हुने विषय उठेपछि समितिले कार्यालय समयलाई समेत ध्यानमा राखेर आगामी कात्तिक ९ गते सूचना प्रकाशन गर्ने निर्णय गरेको छ ।
समितिका सभापति श्रेष्ठले नागरिकलाई जानकारी गराउन तथा उजुरी संकलन गर्ने उद्देश्यले सरकारी सञ्चारमाध्यम र संसद् सचिवालयको वेबसाइटमा सूचना प्रकाशन गर्न सचिवालयलाई निर्देशन दिएका छन् ।
प्रस्तावित राजदूतविरुद्ध परेका उजुरीमाथि सुनुवाइ गरी संसदीय प्रक्रिया अघि बढाउने क्रममा उजुरीकर्ताको अनुपस्थितिले समितिको काम प्रभावित हुने देखिएको छ ।
