काठमाडौं । काठमाडौंको महाराजगञ्जस्थित राष्ट्रिय प्रहरी प्रशिक्षण प्रतिष्ठानमा ३४० कार्यदिन लामो आधारभूत तालिम सफलतापूर्वक सम्पन्न गरी आठ महिलासहित ७९ जना नवप्रवेशी प्रहरी निरीक्षक दीक्षित भएका छन् ।
सोमबार आयोजित प्रहरी निरीक्षक आधारभूत तालिमको १८४औँ समूहको दीक्षान्त कवाज समारोहमा उनीहरू दीक्षित भएका हुन् । तालिम सम्पन्न गरेसँगै नवदीक्षित प्रहरी निरीक्षकहरूले नागरिक सेवा, शान्ति सुरक्षा र अपराध नियन्त्रणको जिम्मेवारी सम्हाल्ने बाटो खुलेको छ ।
प्रतिष्ठानका कार्यकारी निर्देशक प्रहरी नायब महानिरीक्षक (डीआईजी) दिनेशकुमार आचार्यका अनुसार २०८२ जेठ २३ गतेदेखि सुरु भएको तालिममा छनोट भएका ७७ जनामध्ये एक जना मिसनमा रहेका र अघिल्लो समूहका तीन जना थपिएपछि कुल ७९ जना प्रशिक्षार्थी सहभागी भएका थिए । दीक्षित हुनेमध्ये ७१ जना पुरुष र आठ जना महिला छन् ।
शैक्षिक योग्यताका आधारमा १६ जना स्नातकोत्तर र ६३ जना स्नातक उत्तीर्ण रहेका छन् । प्रदेशगत रूपमा कोशीबाट १७, मधेसबाट १२, बागमतीबाट ११, गण्डकीबाट १०, लुम्बिनीबाट १६, कर्णालीबाट पाँच र सुदूरपश्चिमबाट आठ जना प्रहरी निरीक्षक दीक्षित भएका छन् ।
कुल एक हजार ३५० पूर्णाङ्कको तालिममा आन्तरिकतर्फ ६२० र बाह्यतर्फ ७३० अङ्कको मूल्याङ्कन गरिएको थियो । तालिममा प्रहरी प्रशासन, कानुन, अपराध अनुसन्धान, सुरक्षा व्यवस्थापन, फरेन्सिक विज्ञान, शारीरिक प्रशिक्षण, फायरिङ, उद्धार तथा विपद् व्यवस्थापनलगायतका विषय समेटिएका थिए ।
बाह्य अभ्यासअन्तर्गत प्रशिक्षार्थीलाई कवाज, फायरिङ, रक क्लाइम्बिङ, विपद् उद्धार, आपत्कालीन स्वास्थ्य प्रतिकार्य तथा भिड नियन्त्रणसम्बन्धी व्यावहारिक प्रशिक्षण दिइएको थियो । देशको भौगोलिक र सामाजिक विविधताबारे जानकारी गराउने उद्देश्यले उनीहरूलाई सगरमाथा र अन्नपूर्ण आधार शिविर तथा मुगुको थराङला पाससम्म स्थलगत अध्ययन भ्रमणसमेत गराइएको थियो ।
दीक्षान्त समारोहलाई सम्बोधन गर्दै डीआईजी आचार्यले प्रहरी निरीक्षकको काँधमा लगाइएको दज्र्यानी चिह्न पदको भार मात्र नभई नागरिकको भरोसा र राज्यको विश्वास भएको बताए ।
उनले विधिको शासन कायम गर्ने, मानव अधिकारको संरक्षण गर्ने तथा ‘सत्य सेवा सुरक्षणम्’ को मूलमन्त्र आत्मसात गर्दै कुनै पनि दबाब र व्यक्तिगत स्वार्थभन्दा माथि उठेर जिम्मेवारी निर्वाह गर्न नवदीक्षित अधिकृतहरूलाई निर्देशन दिए ।
विविध पृष्ठभूमिबाट आएका प्रशिक्षार्थीलाई राष्ट्रसेवा, जनसुरक्षा र नागरिकमैत्री प्रहरी सेवाको साझा उद्देश्यमा आबद्ध गर्दै व्यावसायिक प्रहरी अधिकृतका रूपमा तयार गरिएको प्रतिष्ठानले जनाएको छ ।
