काठमाडाैँ। तनहुँको बन्दीपुर गाउँपालिका–५, याम्पाफाँटका १५ जना उत्कृष्ट दुग्ध उत्पादक किसान पुरस्कृत भएका छन् । याम्पाफाँट दुग्ध उत्पादक सहकारी संस्थाले गत आर्थिक वर्षमा सहकारीमार्फत सबैभन्दा बढी दूध बिक्री गर्ने किसानलाई नगद पुरस्कारसहित सम्मान गरेको हो ।
सहकारीका अध्यक्ष काशीनाथ भट्टराईका अनुसार दूध बिक्रीका आधारमा किसानलाई छनोट गरी तीन हजारदेखि ११ हजार रुपैयाँसम्म नगद पुरस्कार प्रदान गरिएको हो ।
सहकारीमार्फत सबैभन्दा बढी दूध बिक्री गर्ने नमुना गाई फार्मका सञ्चालक पुष्पराज पौडेल प्रथम हुनुभएको छ । उहाँले गत आर्थिक वर्षमा ८९ हजार १२८ लिटर दूध बिक्री गर्नुभएको थियो ।
त्यसैगरी ५१ हजार ८१२ लिटर दूध बिक्री गर्ने व्यावसायिक किसान काशीनाथ भट्टराई दोस्रो र ४४ हजार ४४४ लिटर दूध बिक्री गर्ने सुरज घिमिरे तेस्रो हुनुभएको छ ।
पुरस्कृत हुने अन्य किसानमा छविलाल घिमिरे चौथो, कमला पन्थ पाँचौँ, हरिप्रसाद भट्टराई छैटौँ र ओमप्रसाद लामिछाने सातौँ स्थानमा रहनुभएको छ । यस्तै, इन्दिरा भट्टराई आठौँ, ऋषिराम भट्टराई नवौँ र रामनाथ भट्टराई दसौँ स्थानमा रहनुभएको छ ।
यसैगरी मुना न्यौपाने एघारौँ, सानुमाया सुनार बाह्रौँ, टकराज लामिछाने तेह्रौँ, इन्दिरा घिमिरे चौधौँ र ओमप्रकाश गुरुङ पन्ध्रौँ स्थानमा रहँदै पुरस्कृत हुनुभएको छ । गुरुङले गत आर्थिक वर्षमा १८ हजार १८४ लिटर दूध बिक्री गर्नुभएको थियो ।
१४ लाख लिटरभन्दा बढी दूध बिक्री
याम्पाफाँट दुग्ध उत्पादक सहकारी संस्थाले गत आर्थिक वर्षमा १४ लाख लिटरभन्दा बढी दूध बिक्री गरेको छ । सहकारीले दूध बिक्रीबाट १७ करोड रुपैयाँभन्दा बढीको कारोबार गरेको अध्यक्ष भट्टराईले जानकारी दिनुभयो ।
पशुपालनका लागि महत्वपूर्ण क्षेत्रका रूपमा परिचित याम्पाफाँटका किसान लामो समयदेखि व्यावसायिक पशुपालनमा सक्रिय छन् । दूध उत्पादनलाई आम्दानीको प्रमुख स्रोत बनाएका यहाँका किसानले स्थानीय अर्थतन्त्र र कृषि उद्यमको विकासमा योगदान पुर्याउँदै आएका छन् ।
सहकारीले दूध बिक्रीका आधारमा उत्कृष्ट किसानलाई पुरस्कृत गर्दै व्यावसायिक पशुपालन र दुग्ध उत्पादनमा किसानलाई प्रोत्साहन गर्ने प्रयास गरेको छ ।
