काठमाडौं । समान विचार भएका राजनीतिक दल तथा शक्तिहरूसँग सहकार्य र एकता गर्ने उद्देश्यले राप्रपा नेपालले गरेको पहल अघि बढेको छ ।
वरिष्ठ उपाध्यक्ष राजिब पराजुलीको संयोजकत्वमा गठन गरिएको राप्रपा नेपालको वार्ता समितिले आज राप्रपा अध्यक्ष राजेन्द्र लिङ्देनसँग औपचारिक रूपमा पार्टी एकताको प्रस्ताव राखेको छ ।
दुवै पक्षबीच भएको छलफल सकारात्मक रहेको समितिका संयोजक पराजुलीले जानकारी दिएका छन् ।
उनका अनुसार, राष्ट्रियता, हिन्दुराष्ट्र, राजसंस्था र सुशासनका साझा एजेन्डामा आधारित भएर एकता र सहकार्यका सम्भावनाहरूबारे विस्तृत चर्चा भएको छ ।
छलफललाई आगामी दिनमा थप गहिरो बनाउँदै एकता प्रक्रियालाई संस्थागत ढंगले अघि बढाउने सहमति भएको पनि बताइएको छ ।
