काठमाडौं । राष्ट्रिय स्वतन्त्र पार्टीकी सांसद इन्दिरा राना मगरले झापाका जनता जंगली हात्तीको आतंक र सुकुम्वासी समस्याबाट पीडित रहेको भन्दै सरकारको ध्यानाकर्षण गराउनुभएको छ ।
प्रतिनिधि सभाको शुक्रवारको बैठकमा बोल्दै सांसद राना मगरले बाली भित्र्याउने समयमा हात्तीले किसानको खेतीमा क्षति पुर्याइरहेको भन्दै नियन्त्रणका लागि तत्काल प्रभावकारी कदम चाल्न सरकारसँग माग गर्नुभयो ।
दशैं नजिकिँदै गर्दा झापाका किसान बाली जोगाउन रातभर जाग्राम बस्नुपर्ने अवस्था रहेको उहाँले बताउनुभयो । हात्ती नियन्त्रणका लागि सरकारी प्रयास प्रभावकारी हुन नसकेको भन्दै उहाँले ‘हात्ती आयो, हात्ती आयो फुस्स’ जस्तो अवस्था देखिएको टिप्पणी गर्नुभयो ।
सांसद राना मगरले झापाको जग्गासम्बन्धी समस्या पनि उत्तिकै जटिल रहेको उल्लेख गर्नुभयो । जग्गाको निस्सा पाइसकेका सुकुम्वासीलाई लालपुर्जा उपलब्ध गराउनुको सट्टा पुनः नापीका नाममा दुःख दिने काम भइरहेको भन्दै उहाँले असन्तुष्टि जनाउनुभयो ।
केही स्थानीय तहबाट ‘माथिबाट आदेश आएको’ भन्दै नागरिकमा भ्रम फैलाउने काम भइरहेको जनगुनासो आएको उल्लेख गर्दै उहाँले सम्बन्धित मन्त्रालयले यस विषयमा स्पष्ट धारणा सार्वजनिक गर्नुपर्ने बताउनुभयो ।
उहाँले भन्नुभयो, “किसानहरू अहिले बाली जोगाउन रातभर निद्रा त्यागेर हात्ती रुङ्न बाध्य छन्, तर सरकारबाट ठोस राहतको प्रत्याभूति हुन सकेको छैन । निस्सा पाइसकेका सुकुम्वासीले अब छिटो लालपुर्जा पाउनुपर्छ, प्रक्रियामाथि प्रक्रिया थपेर उनीहरूलाई थप कष्ट दिनु हुँदैन ।”
सांसद राना मगरले हात्तीबाट पीडित किसानलाई राहत उपलब्ध गराउनुका साथै निस्सा पाइसकेका सुकुम्वासीलाई तत्काल जग्गाको स्वामित्व प्रमाणपत्र उपलब्ध गराउन सरकारले अविलम्ब कार्ययोजना सार्वजनिक गर्नुपर्ने माग गर्नुभयो ।
