नुवाकोट । सामुदायिक विकास केन्द्र नेपाल (सीडीसी नेपाल) र नेपाल सहायता फाउन्डेसनको संयुक्त सहकार्यमा नुवाकोटका बाढी प्रभावित १५० गर्भवती तथा स्तनपान गराइरहेका महिलालाई पोषणयुक्त खाद्य सामग्री वितरण गरिएको छ।
रसुवा–नुवाकोट बाढीको प्रतिकार्यअन्तर्गत नगरपालिकासँगको समन्वयमा कार्यक्रम सञ्चालन गरिएको हो। बाढीपछि प्रभावित महिलाको तत्कालीन पोषण आवश्यकतालाई सम्बोधन गर्ने उद्देश्यले खाद्य सामग्री वितरण गरिएको आयोजकले जनाएको छ।
सीडीसी नेपाल र नेपाल सहायता फाउन्डेसनको टोलीले घेर्खु स्वास्थ्य चौकी, महारानी स्वास्थ्य चौकी, घण्टाघर स्वास्थ्य चौकी र त्रिशूली स्वास्थ्य चौकीमा पुगेर लाभग्राहीलाई आवश्यक खाद्य सामग्रीसहितको पोषण प्याकेज हस्तान्तरण गरेको थियो।
कार्यक्रममा सीडीसी नेपालकी अध्यक्ष राधा मातंगी , नेपाल सहायता फाउन्डेसनका कार्यकारी अध्यक्ष योगी कायस्थ तथा सचिव हृदेन्द्र ह्यौन्मिखाको उपस्थिति थियो। उहाँहरूले लाभग्राहीलाई पोषण सामग्री हस्तान्तरण गर्नुभएको थियो।
बाढीपछि गर्भवती तथा सुत्केरी महिलाको पोषण र स्वास्थ्यमा थप जोखिम हुन सक्ने भएकाले उनीहरूलाई लक्षित गरी सहयोग गरिएको दुवै संस्थाले जनाएको छ।
नगरपालिका तथा स्वास्थ्य चौकीसँगको समन्वयमा सञ्चालन गरिएको यस कार्यक्रममार्फत विपद्प्रभावित महिलासम्म तत्काल राहत तथा पोषण सहयोग पुर्याइएको आयोजकको भनाइ छ।
