काठमाडौं । नेपाली कांग्रेसका सांसद नरेन्द्रकुमार केरुङले सरकारले निर्माण गरेका आधारभूत अस्पतालहरूमा दरबन्दी, उपकरण र औषधिको अभाव हुँदा सेवा सञ्चालन हुन नसकेको भन्दै सरकारको ध्यानाकर्षण गराउनुभएको छ ।
शुक्रवार प्रतिनिधि सभा बैठकमा विशेष समय लिएर बोल्दै सांसद केरुङले स्वास्थ्य सेवाको अधिकार सुनिश्चित गर्न सरकारसमक्ष १० बुँदे प्रश्न र सात बुँदे ठोस प्रस्ताव प्रस्तुत गर्नुभयो ।
उहाँले आफ्नो निर्वाचन क्षेत्र पाँचथरका ग्रामीण बस्तीमा स्वास्थ्य सेवाको अवस्था दयनीय रहेको उल्लेख गर्दै संघीय सरकारले ६५७ वटा आधारभूत अस्पताल निर्माण गर्ने घोषणा गरे पनि धेरै अस्पतालका भवनमा बिरामीले उपचार पाउन नसकेको बताउनुभयो ।
संघ, प्रदेश र स्थानीय तहबीच स्वास्थ्य क्षेत्रको जिम्मेवारी बाँडफाँटमा स्पष्टता नहुँदा स्वास्थ्य प्रणाली नै प्रभावित भएको उहाँको भनाइ थियो ।
‘हामीले अस्पताल बनायौँ कि केवल भवन ? आज ग्रामीण क्षेत्रका स्थानीय तहसँग अस्पताल चलाउने न आर्थिक स्रोत छ, न चिकित्सक वा स्वास्थ्यकर्मीको दरबन्दी नै,’ उहाँले भन्नुभयो ।
सांसद केरुङले महालेखा परीक्षकको प्रतिवेदनलाई उद्धृत गर्दै निर्माण सम्पन्न भएका धेरै आधारभूत अस्पताल जनशक्ति र आवश्यक स्वास्थ्य उपकरणको अभावमा प्रयोगविहीन अवस्थामा रहेको बताउनुभयो ।
उहाँले अस्पतालका भवन निर्माणसँगै आवश्यक जनशक्ति, उपकरण, औषधि तथा आर्थिक स्रोतको सुनिश्चितता गरी ग्रामीण क्षेत्रका नागरिकलाई गुणस्तरीय स्वास्थ्य सेवा उपलब्ध गराउन सरकारसँग माग गर्नुभयो।
