काठमाडौँ । नेपाली कांग्रेसले १५औँ महाधिवेशनको प्रचारप्रसारमा तामझाम नगर्ने भएको छ। पार्टीले महाधिवेशनलाई वातावरणमैत्री बनाउँदै प्रचारप्रसारमा प्रविधिको प्रयोगलाई प्राथमिकता दिने जनाएको छ।
महाधिवेशनको तयारीबारे जानकारी दिन शुक्रबार पार्टी केन्द्रीय कार्यालय सानेपामा आयोजित विशेष पत्रकार सम्मेलनमा कांग्रेस प्रवक्ता देवराज चालिसेले उम्मेदवारहरूलाई प्रचारप्रसारमा पर्चा, पोस्टर तथा अन्य सामग्री प्रयोग नगर्न आग्रह गरिएको जानकारी दिए।
उनका अनुसार महाधिवेशनका क्रममा शहरका विभिन्न स्थानमा तामझामसहित प्रचारप्रसार सामग्री टाँसिने छैन। त्यसको सट्टा डिजिटल माध्यम र डिजिटल बोर्डमार्फत प्रचारप्रसार गर्ने नीति पार्टीले लिएको छ।
प्रवक्ता चालिसेले भने, “१५औँ महाधिवेशनमा तामझामसहित प्रचारप्रसार सामग्री शहरमा टाँसिँदैन। सकेसम्म प्रविधिको प्रयोग गर्न उम्मेदवारहरूलाई आग्रह गरिएको छ। वातावरणमैत्री प्रचारप्रसार गर्ने नीति पार्टीले लिएको छ।”
कांग्रेसले प्रचारप्रसारका लागि पर्चा नछाप्नसमेत उम्मेदवारहरूलाई आग्रह गरेको छ। पार्टीले महाधिवेशनलाई व्यवस्थित र वातावरणमैत्री बनाउन डिजिटल प्रचारलाई प्राथमिकता दिने जनाएको हो।
