काठमाडौं । काठमाडौंमा आगामी सातादेखि सुरू हुने चार देशीय महिला फुटबल च्याम्पियनसिपमा खेल्ने नेपालको अन्तिम टोली घोषणा भएको छ ।
बिहीबार प्रशिक्षक राजेन्द्र तामाङले एन्जिला तुम्बापो सुब्बाको कप्तानीमा २३ सदस्यीय टोली सार्वजनिक गरेका हुन् । टोलीमा दुई नयाँ खेलाडी पनि परेका छन् ।
डिफेन्डर मनमाया दमाइ र मिडफिल्डर सुष्मा तामाङ पहिलोपटक राष्ट्रिय टोलीमा परेका हुन् । साफ च्याम्पियनसिपका दौरान घाइते भएका हिराकुमारी भुजेल र दिपा शाहीको स्थानमा उनीहरूले खेल्ने प्रशिक्षक तामाङले जनाए ।
गोलरक्षकमा कप्तान एन्जिलासँगै अन्जना राना मगर र उषा नाथ छन् । त्यस्तै, डिफेन्डरहरूमा अमृता जैसी, गिता राना, बिमला बिक, पुजा राना, निशा थोकर, समिक्षा घिमिरे, बिमला चौधरी र मनमाया दमाइ छन् भने मिडिफिल्डरमा अनिता बस्नेत, रेनुका नगरकोटी, प्रीति राई, सरु लिम्बु, सबिता रानामगर, रेनुका हमाल र सुष्मा तामाङ हुनेछन् ।
फरवार्डमा साबित्रा भण्डारी, रेखा पौडेल, रश्मी कुमारी घिसिङ, चन्द्रा भण्डारी, अनिता केसीले साथ दिनेछन् ।
एन्फाको आयोजनामा फागुन ५ देखि दशरथ रंगशालामा नेपाल, म्यानमार, लेबनान र कीर्गिस्तान सम्मिलित महिला फुटबल प्रतियोगिता हुँदै छ ।प्रतियोगितामा सहभागी हुन कीर्गिस्तान आज आउँदै छ भने बाँकी दुई टोली फागुन २ गते आइपुग्ने बताईएको छ ।
