काठमाडौं । अविरल वर्षापछिको पहिरो र नदी कटानका कारण मुस्ताङ जिल्ला पछिल्लो ७२ घण्टादेखि राज्यको सम्पर्कबाट लगभग विच्छेद भएको छ ।
विद्युत् प्रसारण लाइनमा क्षति पुगेपछि जिल्लाभर विद्युत् आपूर्ति अवरुद्ध भएको छ भने बेनी–जोमसोम–कोरला सडकखण्डका ४६ स्थानमा क्षति पुगेको छ । सडक, विद्युत् तथा सञ्चार पूर्वाधारमा भएको क्षतिले स्थानीय जनजीवनसँगै राष्ट्रिय आपूर्ति प्रणालीसमेत प्रभावित भएको छ ।
प्रतिनिधि सभाको बुधवारको बैठकमा मुस्ताङका नेपाली कांग्रेस सांसद योगेश गौचन थकालीले जिल्लाको विपद्को अवस्थाबारे सदन र सरकारको ध्यानाकर्षण गराउनुभयो । उहाँले लोमान्थाङ गाउँपालिकाका विभिन्न वडामा सिँचाइ प्रणाली र कृषि पूर्वाधारमा क्षति पुगेको तथा घरपोझ्याङ र थासाङ गाउँपालिकाका बस्ती जोखिममा परेको जानकारी गराउनुभयो ।
विशेषगरी लुक्रा गाउँमा स्थानीयका घर पूर्ण तथा आंशिक रूपमा क्षति भएको उहाँले बताउनुभयो ।
म्याग्दीको दानामा रहेको सबस्टेसन र ३३ केभी प्रसारण लाइनमा क्षति पुगेपछि मुस्ताङ तीन दिनदेखि अन्धकारमा रहेको सांसद थकालीले बताउनुभयो । सञ्चार तथा इन्टरनेट सेवा अवरुद्ध हुँदा जिल्लाको वास्तविक अवस्था बुझ्न र उद्धार तथा राहत कार्य अघि बढाउनसमेत राज्य संयन्त्रलाई कठिनाइ भइरहेको उहाँको भनाइ थियो ।
सांसद थकालीले दुर्गम सीमावर्ती क्षेत्रमा सडक, विद्युत् र सञ्चारको पहुँच कायम राख्नु तथा विपद्का बेला तत्काल उद्धार गर्न सक्ने व्यवस्था मिलाउनु राष्ट्रिय सुरक्षाको महत्वपूर्ण आधार भएको बताउनुभयो ।
उहाँले भन्नुभयो, “सुरक्षालाई सेना र प्रहरीमा मात्र सीमित नराखी आधारभूत पूर्वाधारको सुरक्षामा पनि राज्यले ध्यान दिनुपर्छ।”
बेनी–जोमसोम–कोरला सडकखण्ड स्थानीय सडक मात्र नभई रणनीतिक महत्वको राष्ट्रिय पूर्वाधार भएको उल्लेख गर्दै उहाँले सडक अवरुद्ध हुँदा चीनसँगको व्यापारिक सम्पर्क र राष्ट्रिय आपूर्ति सञ्जालमा प्रत्यक्ष असर परेको बताउनुभयो ।
सांसद थकालीले मुस्ताङमा देखिएको विपद्लाई राष्ट्रिय सुरक्षा र जलवायु सुरक्षाको दृष्टिकोणबाट हेरी तत्काल उद्धार, राहत तथा पूर्वाधार पुनःस्थापनाका लागि सरकारको प्रभावकारी पहल आवश्यक रहेको बताउनुभयो ।
