काठमाडौं । प्रतिनिधि सभाको बुधबारको बैठकमा सांसदहरूले मुलुकमा थुप्रिएको अवैध सम्पत्ति तथा कालो धन नियन्त्रण गर्न ५ सय र एक हजार रुपैयाँ दरका नोटमा प्रतिबन्ध लगाउन सरकारसँग माग गरेका छन् ।
राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेले भ्रष्टाचारबाट जम्मा भएको रकमलाई बैंकिङ प्रणालीमा ल्याउन वा निष्क्रिय बनाउन नोटबन्दी आवश्यक रहेको बताउनुभयो । उहाँले लामो समयदेखि राज्य दोहनबाट जम्मा भएको कालो धनले मुलुकको सुशासनमा चुनौती थपिएको दाबी गर्नुभयो ।
भारतको उदाहरण दिँदै सांसद न्यौपानेले नेपाल राष्ट्र बैंक ऐनमा रहेको व्यवस्थाको प्रयोग गरी तत्काल पुराना नोट विस्थापन गरेर नयाँ नोट जारी गर्न सरकारसँग आग्रह गर्नुभयो ।
उहाँले भन्नुभयो, ‘भ्रष्टाचारीहरूले लुकाएको पैसा खरानी बनाउन र देशलाई सुशासनको मार्गमा अगाडि बढाउन सरकारले तत्काल नोटबन्दी गरी नयाँ नोट जारी गर्नुपर्छ ।’
न्यौपानेको प्रस्तावलाई नेपाली कम्युनिस्ट पार्टीका प्रमुख सचेतक युवराज दुलालले समर्थन गर्नुभयो । उहाँले आवश्यक परे नोटबन्दीका लागि सांसदहरूको हस्ताक्षर अभियान सञ्चालन गर्न आफ्नो दल तयार रहेको बताउनुभयो ।
साथै दुलालले सरकारमा रहेको दलले नै नोटबन्दी कार्यान्वयन गर्न किन ढिलाइ गरिरहेको भन्दै प्रश्न गर्नुभयो । उहाँले यस विषयमा सभामुखबाट रुलिङ हुनुपर्ने मागसमेत गर्नुभयो ।
दुलालले भन्नुभयो, ‘हाम्रो दलको तर्फबाट पूर्ण समर्थन छ । तर सत्तामा रहेको दलले यो काम गर्न किन ढिलाइ गरिरहेको छ ? सम्माननीय सभामुखज्यू, यस विषयमा रुलिङ होस् ।’
सांसदहरूको मागसँगै प्रतिनिधि सभामा कालो धन नियन्त्रणका लागि नोटबन्दी गर्ने विषयमा बहस सुरु भएको छ ।
