काठमाडौं । नेपाली कम्युनिष्ट पार्टीका सांसद महेन्द्रबहादुर शाहीले सरकारको कार्यशैली परिवर्तन गर्नुपर्ने बताउनुभएको छ ।
बुधबार बसेको प्रतिनिधि सभाको बैठकमा बोल्दै सांसद शाहीले सरकार सही मार्गबाट विचलित भएर अघि बढ्दा गम्भीर दुर्घटना निम्तिन सक्ने चेतावनी दिनुभयो । उहाँले वर्तमान सरकारको कार्यसम्पादनप्रति असन्तुष्टि जनाउँदै आगामी दिनमा सरकारले नराम्रो परिणाम भोग्नुपर्ने अवस्था आउन सक्ने बताउनुभयो ।
सरकारले आफ्नो परिपक्वता प्रदर्शन गर्दै सही मार्गमा फर्किनुपर्ने उहाँको भनाइ थियो । राजधानी काठमाडौंलाई कर्णालीसँग जोड्ने मुख्य राजमार्ग तथा करिडोरमा भइरहेको अवरोधप्रति चिन्ता व्यक्त गर्दै शाहीले बाढीपहिरोका कारण कर्णालीका नागरिकले पटक–पटक समस्या भोग्नुपरे पनि राज्यले त्यसलाई गम्भीरतापूर्वक नलिएको बताउनुभयो ।
उहाँले भन्नुभयो, ‘कर्णालीका नागरिक पटक–पटक बाढी र पहिरोको चपेटामा छन्, तर राज्यले यसलाई गम्भीरताका साथ लिएको छैन ।’
कालिकोटको गगने खोला, एस मोड, खल्लागाड र राजुली क्षेत्रमा पटक–पटक पहिरो खस्दा जनजीवन प्रभावित भएको उहाँले बताउनुभयो । चाडपर्वको मुखमा नागरिकलाई घर जानसमेत कठिनाइ भइरहेको भन्दै उहाँले तत्काल मेसिन तथा प्राविधिक जनशक्ति परिचालन गरी सडक सञ्चालनमा ल्याउन सरकारसँग माग गर्नुभयो ।
पहिरो पन्छाउने कामले मात्रै दीर्घकालीन समाधान नहुने उल्लेख गर्दै सांसद शाहीले कर्णाली राजमार्गका जीर्ण सुरक्षा बार तत्काल फेर्न तथा जोखिमयुक्त स्थानमा आधुनिक सुरक्षा संरचना निर्माण गर्न सरकारको ध्यानाकर्षण गराउनुभयो ।
