काठमाडौं । श्रम संस्कृति पार्टीकी सांसद अम्बिकादेवी संग्रौलाले प्रधानमन्त्री बालेन्द्र साहले गत जेठ १७ गते संसद्को रोस्ट्रमबाट दिएको अभिव्यक्ति संसद्को रेकर्डबाट हटाउन माग गर्नुभएको छ ।
बुधबार प्रतिनिधि सभाको बैठकमा बोल्दै सांसद संग्रौलाले प्रधानमन्त्री साहले ‘नेपालले पनि भारतको सीमा मिचेको’ भनी दिएको अभिव्यक्ति आपत्तिजनक रहेको बताउनुभयो । उहाँले उक्त अभिव्यक्तिलाई ‘राष्ट्रघाती’ संज्ञा दिँदै राष्ट्रिय हितविपरीत रहेको दाबी गर्नुभयो ।
सांसद संग्रौलाले सो अभिव्यक्ति रेकर्डबाट हटाउन आफूहरूले पटक–पटक माग गर्दै आए पनि अहिलेसम्म सुनुवाइ नभएको बताउनुभयो । उहाँले भन्नुभयो, “हाम्रो देशले भारतको सीमा मिचेको भनी प्रधानमन्त्रीज्यूले दिनुभएको अभिव्यक्ति राष्ट्रघाती छ । यस्तो अभिव्यक्तिलाई यस सम्मानित सदनको रेकर्डबाट हटाउन हामीले पटक–पटक माग गर्दै आएका छौँ, तर अहिलेसम्म हाम्रो मागको सुनुवाइ भएको छैन ।”
सरकारले यस विषयमा अहिलेसम्म जवाफ नदिएको भन्दै उहाँले असन्तुष्टि व्यक्त गर्नुभयो । आफ्नो मागको सम्बोधन कहिलेसम्म हुने हो भन्ने प्रश्न गर्दै सांसद संग्रौलाले सभामुखमार्फत सरकारको ध्यानाकर्षण गराउनुभयो ।
प्रधानमन्त्रीको उक्त अभिव्यक्तिलाई लिएर यसअघि पनि विभिन्न दलका सांसदहरूले संसद्मा विरोध जनाउँदै आएका थिए । सांसद संग्रौलाले यस विषयलाई सरकारले बेवास्ता गर्न नहुने बताउनुभयो ।
