काठमाडौं। श्रम संस्कृति पार्टीका प्रमुख सचेतक आर्यन राईले मनाङको हिमलुङ हिमालमा गएको हिमपहिरोमा बेपत्ता भएकाको खोजी, त्रिपुरेश्वर आत्मदाह घटनाका पीडित परिवारसँग संवाद र पोल्याण्डमा कार्यरत नेपाली श्रमिकले बैंक खाता खोल्न नपाएको समस्याबारे सरकारको ध्यानाकर्षण गराउनुभएको छ।
बुधबार प्रतिनिधिसभाको बैठकमा बोल्दै सांसद राईले गत असोज ११ गते मनाङको हिमलुङ हिमालमा गएको हिमपहिरोमा परी खोटाङको ऐसेलुखर्क गाउँपालिकाका तीन जना श्रमिक बेपत्ता भएको स्मरण गराउनुभयो। उहाँका अनुसार बेपत्तामध्ये घनश्याम राईको शव फेला परिसकेको भए पनि लककुमार गुरुङ र सुरज राईको अवस्था अझै अज्ञात छ।
बेपत्ताका आफन्तले खोजी कार्यमा सरकारले पर्याप्त तत्परता नदेखाएको गुनासो गरिरहेको भन्दै राईले तत्काल प्रभावकारी खोजी तथा उद्धारको पहल गर्न सरकारसँग आग्रह गर्नुभयो।
त्यस्तै, त्रिपुरेश्वरमा भएको आत्मदाहको घटनामा मृत्यु भएका अर्जुन दोङ तामाङका परिवारसँग सरकारले संवाद नगरेको विषय पनि उहाँले सदनमा उठाउनुभयो। न्याय र वार्ताको माग गर्दै पीडित परिवार गृह मन्त्रालय पुगे पनि सम्बन्धित मन्त्रीसँग भेट हुन नसकेको भन्दै उहाँले सरकारको संवेदनशीलतामाथि प्रश्न उठाउनुभयो।
पोल्याण्डमा कार्यरत नेपाली श्रमिकले भोग्नुपरेको बैंकिङ समस्याबारे पनि राईले सरकारको ध्यानाकर्षण गराउनुभयो। पोल्याण्डका बैंकले नेपाली श्रमिकलाई बैंक खाता खोल्न नदिएको र यसको प्रमुख कारण नेपाल ‘ग्रे लिस्ट’मा पर्नु रहेको गुनासो श्रमिकबाट आएको उहाँले बताउनुभयो।
बैंक खाता खोल्न नपाउँदा पारिश्रमिक बुझ्न तथा दैनिक खर्च व्यवस्थापन गर्नसमेत समस्या भएको भन्दै राईले समस्या समाधानका लागि परराष्ट्र मन्त्रालय र श्रम मन्त्रालयलाई तत्काल कूटनीतिक तथा प्रशासनिक पहल गर्न आग्रह गर्नुभयो।
