नयाँदिल्ली । भारतमा प्रधानमन्त्री नरेन्द्र मोदीको अगुवाईमा रहेको भारतीय जनता पार्टीको सत्तारुढ गठबन्धनले “एक देश, एक निर्वाचन” सम्बन्धी विवादास्पद विधेयक संसदमा दर्ता गरेको छ ।
संसदमा दर्ता भएसँगै लोकसभाले उक्त विधेयकलाई छलफलका लागि मञ्जुरी दिएको छ । भारतीय संचारमाध्यमहरुका अनुसार विधेयकको समर्थनमा २६९ सांसदले हस्ताक्षर गरेका छन् भने १९८ सांसद विपक्षमा उभिएका छन् ।
अब उक्त विधेयक संयुक्त सदनको समितिमा छलफलका लागि गएको छ । भारतीय काँग्रेस आई समेतका विपक्षी पार्टीहरुले सरकारको निर्वाचन सम्बन्धी यस कदमले भारतीय संविधानको भावना बमोजिम संघीय संरचनामाथि हस्तक्षेप भएको आरोप लगाएका छन् । तर सरकारले उक्त आरोपको खण्डन गरेको छ ।
विधेयकको सम्बन्धमा लोकसभामा भएको मतदानमा भारतको इतिहासमै पहिलो पटक विद्युतीय मतदानको प्रयोग गरिएको थियो ।
यदि उक्त विधेयक संसदका दुबै सदनबाट पारित भएर राष्ट्रपतिबाट प्रमाणित भए भारतमा लोकसभा र राज्यसभाका सबै निर्वाचन एकैपटक हुनेछन् । अहिले भारतका विभिन्न राज्यमा विभिन्न समयमा निर्वाचन हुने गरेको छ । एजेन्सी
