काठमाडौँ । नेपाल प्रिमियर लिग (एनपिएल) भोलि शनिबारदेखि सुरु हुँदैछ । उद्घाटन खेलमा विराटनगर किंग्स र जनकपुर बोल्ट्स भिड्दैछन् ।
उद्घाटन खेलको टिकट बिक्रि यसअघि नै सोल्ड आउट भइसकेको छ । यसैबीच, नेपाल क्रिकेट संघ (क्यान)का सचिव पारस खड्काले उद्घाटन दिनको पासका लागि फोन तथा म्यासेज नगर्न आग्रह गरेका छन् ।
खड्काले सामाजिक सञ्जालमार्फत यस्तो आग्रह गरेका हुन् । ‘कृपया भोलिको पासका लागि फोन वा सन्देश नगर्नुहुन हार्दिक अनुरोध गर्दछौं । बाँकी खेलहरूको लागि पनि अवसर हुनेछ । यहाँहरूको समर्थन निरन्तर रहोस्, र भविष्यमा पर्याप्त पूर्वाधारको साथ सबैलाई समेट्न सक्ने नेपाल क्रिकेट संघ बन्ने हाम्रो प्रयास जारी रहनेछ ।’ खड्काले भनेका छन् ।
साथै, सचिव खड्काले उद्घाटन खेलको टिकट र भिआईपी पासहरू सबै सीमित पूर्वाधारका कारण सकिएको हुँदा सबैलाई समन्वय गर्न अनुरोध गर्दै भोलिको खेलको लागि टिकट नभएकाहरूले टिभी वा डिजिटल प्लेटफर्मबाट नै खेल हेर्नु पनि अनुरोध गरेका छन् । भोलिको उद्घाटन खेल दिउँसो सवा २ बजे सुरु हुनेछ ।
