काठमाडौं । ब्रिटिस काउन्सिलले अङ्ग्रेजी भाषा शिक्षणमा सिर्जनशीलता, समावेशिता र प्रविधिको प्रभावकारी प्रयोगबारे केन्द्रित ‘साउथ एसिया टिचिङ इङ्ग्लिस अनलाइन कन्फ्रेन्स २०२६’ आयोजना गर्ने भएको छ। जुलाई २३ देखि २५ सम्म सञ्चालन हुने तीनदिने निःशुल्क अनलाइन सम्मेलनमा दक्षिण एसियाका शिक्षक, अनुसन्धानकर्ता तथा शिक्षा क्षेत्रका विज्ञहरू सहभागी हुनेछन्।

सम्मेलनमा बदलिँदो विश्व परिवेशमा विद्यार्थीलाई आवश्यक पर्ने सिर्जनशीलता, आलोचनात्मक सोच, प्रभावकारी सञ्चार, सहकार्य र समस्या समाधानजस्ता सीप विद्यालय शिक्षामार्फत कसरी विकास गर्न सकिन्छ भन्ने विषयमा छलफल हुनेछ। साथै, अङ्ग्रेजी भाषा शिक्षणलाई केवल भाषिक दक्षतामा सीमित नराखी विद्यार्थी–केन्द्रित, समावेशी र नवप्रवर्तनमुखी शिक्षण पद्धतितर्फ कसरी अघि बढ्ने भन्ने विषय पनि सम्मेलनको मुख्य एजेन्डा रहनेछ।

ब्रिटिस काउन्सिलका अनुसार सम्मेलनले बंगलादेश, भारत, नेपाल, पाकिस्तान र श्रीलंकाका शिक्षा विज्ञलाई एउटै मञ्चमा ल्याई विविध भाषिक पृष्ठभूमिका विद्यार्थीका लागि समावेशी कक्षाकोठा निर्माण, सिर्जनशील शिक्षण अभ्यास, विद्यार्थीको सहभागिता वृद्धि तथा कृत्रिम बुद्धिमत्ता (एआई)लाई मानव–केन्द्रित शिक्षणको पूरकका रूपमा प्रयोग गर्ने उपायबारे अनुभव आदान–प्रदान गर्ने अवसर प्रदान गर्नेछ।

सम्मेलनमा मुख्य प्रस्तुति, अनुसन्धानमा आधारित छलफल, व्यवहारिक शिक्षण अनुभव तथा सफल अभ्यासहरू प्रस्तुत गरिनेछन्। सहभागीहरूले दक्षिण एसियाली मुलुकहरूले साझा शैक्षिक चुनौतीहरूको स्थानीय स्तरमा कसरी समाधान गरिरहेका छन् भन्नेबारे जानकारी प्राप्त गर्नेछन्।

ब्रिटिस काउन्सिल नेपालका कन्ट्री डाइरेक्टर रुस्तम मोदीले विद्यार्थीलाई भविष्यका लागि तयार बनाउन सिर्जनशील शिक्षण अपरिहार्य भएको बताए। उनका अनुसार प्रभावकारी सञ्चार, सहकार्य र आलोचनात्मक सोचजस्ता सीप विकासमा सिर्जनशीलताको महत्वपूर्ण भूमिका रहने भएकाले सम्मेलनमार्फत शिक्षक तथा शिक्षा क्षेत्रका सरोकारवालालाई अनुसन्धानमा आधारित व्यवहारिक अवधारणा र कक्षाकोठामा लागू गर्न सकिने रणनीतिबारे जानकारी प्रदान गरिनेछ।

सम्मेलनमा श्रीलंकाकी अञ्जु मोसेस, भारतकी हुमा हसना रियाज अहमद, डा. अमोल पदवाद र निसार शेख, नेपालका शोभा भट्टराई, आस्था कुमारी चौधरी र कृष्ण आर.सी., पाकिस्तानकी डा. फौजिया शमिम तथा रविया शफी, बंगलादेशका डा. एम.डी. मोस्ताफिजुर रहमान र डा. एम.डी. मोहिव उल्लाहलगायत दक्षिण एसियाका अनुभवी शिक्षक, प्रशिक्षक र शिक्षा विज्ञहरूले प्रस्तुति दिनेछन्।

ब्रिटिस काउन्सिलले सम्मेलन शिक्षकहरूको व्यावसायिक क्षमता अभिवृद्धि, समावेशी शिक्षण अभ्यासको प्रवर्द्धन तथा प्रविधिमैत्री अङ्ग्रेजी भाषा शिक्षणलाई सुदृढ बनाउन महत्वपूर्ण अवसर हुने जनाएको छ।