काठमाडौं। फिफा विश्वकप-२०२६ अन्तर्गत तेस्रो स्थानको लागि भएको खेलमा फ्रान्सलाई पराजित गर्दै इंग्ल्यान्ड विजयी भएको छ।
मियामी स्टेडियममा भएको रोमाञ्चक खेलमा इंग्ल्यान्डले पहिलो हाफमै फ्रान्समाथि पूर्ण दबाब बनाएको थियो। डेक्लान राइसले पेनाल्टी क्षेत्र बाहिरबाट उत्कृष्ट गोल गर्दै इंग्ल्यान्डलाई अग्रता दिलाए। एज्री कोन्साले दोस्रो गोल थपेपछि साकाले लगातार दुई गोल गर्दै पहिलो हाफमै इंग्ल्यान्डलाई ४–० को बलियो अवस्थामा पुर्याए।
दोस्रो हाफमा भने खेलले नाटकीय मोड लियो। माइकल ओलिसेको पासमा किलियन एमबाप्पेले फ्रान्सका लागि पहिलो गोल गरे। त्यसपछि एमबाप्पेको पासमा ब्राड्ली बार्कोलाले गोल गर्दै अन्तर घटाए।
एमबाप्पेले अर्को गोल थपेपछि फ्रान्स ४–३ को अवस्थामा पुगेको थियो।इंग्ल्यान्डमाथि फ्रान्सले लगातार दबाब बढाइरहेका बेला साकाले पेनाल्टीमार्फत आफ्नो ह्याट्रिक पूरा गर्दै टोलीलाई केही राहत दिलाए। तर ओस्मान डेम्बेलेले गोल गरेपछि फ्रान्स फेरि खेलमा फर्किएको थियो।अन्ततः इंग्ल्यान्डका प्रतियोगिताका उत्कृष्ट खेलाडी जुड बेलिङ्घमले उत्कृष्ट ड्रिब्लिङ गर्दै निर्णायक गोल गरेपछि इंग्ल्यान्डले ६–४ को जित सुनिश्चित गर्यो।
यो जितसँगै इंग्ल्यान्डले सन् १९६६ मा घरेलु मैदानमा विश्वकप जितेयताकै विश्वकपमा आफ्नो उत्कृष्ट प्रदर्शन गरेको छ। यता फ्रान्सका प्रशिक्षक डिडियर डेसाम्प्सको सफल कार्यकाल पनि यही खेलसँगै अन्त्य भएको छ।
