काठमाडौँ। नेकपा एमाले अध्यक्ष केपी शर्मा ओलीले केही शक्तिहरु देशलाई पुनः अन्धकार युगतिर फर्काउने प्रयासमा जुटिरहेको बताउनुभएको छ ।
पार्टी केन्द्रिय कार्यालय च्यासलमा शनिवार आयोजित संविधान दिवस समारोहलाई सम्बोधन गर्दै उहाँले यस्तो बताउनुभएको हो ।
उहाँले स्थिति, विधि, पद्धति, प्रक्रियाबाट नभइ बलजफ्तीको तरिकाहरु अवलम्वन भइरहेको बताउनु भयो । अराजक तरिकाले मुलुकलाई हाक्ने, अराजक तरिकाले संवैधानिक निकाय र संस्थाहरुलाई हाक्ने, मुलुकमा अराजकता व्याप्त भएको आरोप लगाउनु भयो ।
संविधान चलाउने काम भइरहेको भन्दै उहाँले संविधान तोड्नकै लागि गत भदौ २३ र २४ गतेको आन्दोलन भएको बताउनु भयो ।
अध्यक्ष ओलीले गत भदौमा कसको संलग्नता थियो भन्नेकुरा बिस्तारै खुल्दै गएको बताउनु भयो । अध्यक्ष ओलीले केही नेपाललाई कुबाटोतिर धकेल्नका लागि विभिन्न प्रकारका शक्तिहरु सक्रिय रहेको बताउनु भयो । गत निर्वाचनमा मौन अवधिभित्र बीबीसीले नेपाललाई झुटो कुरा संप्रेषण गरेर अल्मल्याएर गलत बाटोतिर निर्वाचनको माध्यमबाट धकेल्न कोशिस गरेको बताउनु भयो ।
अध्यक्ष ओलीले भन्नुभयो, ‘कतिपय पछाडि, ब्ल्याक होलतिर, अन्धकार युगतिर फर्काउने, अराजकतातिर फर्काउने प्रयासमा जुटिरहेका छन् । स्थिति होइन, विधि होइन, पद्धति होइन, प्रक्रिया होइन, बलजफ्तिको यस्ता तरिकाहरु अवलम्बन भइरहेका छन् । यति व्यापक भएको छ यो तरिका, विधिहीनता, पद्धतिहीनता, नीतिहीनता, अराजकता । अराजक तरिकाले मुलुकलाई हाक्ने, अराजक तरिकाले संवैधानिक निकाय र संस्थाहरुलाई हाक्ने, मुलुकमा अराजकता व्याप्त गर्ने । अराजकताले के ल्याउँछ, हिंसा । अराजकताले के ल्याउँछ, अकर्मण्यता । अराजकताले गैरजिम्मेवारपन ल्याउँछ, अराजकताले दिशाहीनता ल्याउँछ, कुनै बाटो ल्याउँदैन । केही एउटा प्रणाली अन्तर्गत, पद्धति अन्तर्गत चलाउने संविधान, संविधान भनेको देशको मूल कानून, त्यसअनुसार चल्ने चलाउने, लोकतान्त्रिक विधि, प्रक्रिया, प्रणालीबाट चल्ने ती कुराहरुलाई तोड्नका लागि नै गत वर्ष भदौ २३–२४ गतेको षड्यन्त्रपूर्ण उपद्रवको आयोजना गरियो नेपालमा । अहिले म को को संलग्न थिए, के के संलग्न थिए, खुल्दै गएका छन्, बोल्दै गएका छन्, छाप्दै गएका छन्, लेख्दै गएका छन्, अहिले मैले धेरै केही भन्नुपर्दैन । केही नेपाललाई कुबाटोतिर धकेल्नका लागि विभिन्न प्रकारका शक्तिहरु सक्रिय छन् । विभिन्न प्रकारका, देखिएरै गरेका छन्, आश्चर्य लाग्दो गरी गरेका छन् । हामीले देखेका छौँ, मौन अवधिभित्र बीबीसीले नेपाललाई झुट कुरा संप्रेषण गरेर अल्मल्याएर गलत बाटोतिर निर्वाचनको माध्यमबाट धकेल्न कोशिस ग¥यो । यो भन्न अप्ठ्यारो मान्नुपर्दैन । मौन अवधि हामीलाई लाग्थ्यो, बीबीसीलाई लाग्दैनथ्यो । अर्थात आफूलाई स्थापित हुँ भन्ने कतिपय अन्तर्राष्ट्रिय मिडिया समेत नेपालमा असत्य छरेर, जनतालाई दिग्भ्रमित पारेर, बेठीक बाटोतिर लान उद्यत भएको त हामीले देख्यौँ । यस्ता अनेक कुराहरु छन् । अहिले विभिन्न प्रकारका अन्तर्राष्ट्रिय खोज, अध्ययन, अनुसन्धानवाला विभिन्न रिपोर्टहरुले पनि देखाएका छन् । सामाजिक सञ्जालहरुले देखाएका छन्, सञ्चार माध्यमहरुले देखाएका छन् ।’
अध्यक्ष ओलीले आफूलाई स्थापित हुँ भन्ने कतिपय अन्तर्राष्ट्रिय मिडिया समेत नेपालमा असत्य छरेर, जनतालाई दिग्भ्रमित पारेर, बेठीक बाटोतिर लान उद्यत भएको जिकिर गर्नुभयो । –न्युज एजेन्सी नेपाल
