काठमाडौं। नेपाली कांग्रेसका महामन्त्री गगन थापाले निजी शिक्षा र स्वास्थ्य क्षेत्रमा लगाइएको ३ प्रतिशत समता कर लागू नगर्ने सरकारको निर्णयको स्वागत गरेका छन्।
सामाजिक सञ्जालमार्फत प्रतिक्रिया दिँदै थापाले उक्त व्यवस्था सुरुदेखि नै अनुपयुक्त रहेको भन्दै आफूहरूले यसको विरोध गर्दै आएको बताए। उनले निजी अस्पताल र विद्यालय रोज्ने सबै नागरिक सम्पन्न नहुने उल्लेख गर्दै धेरैका लागि निजी सेवा रोज्नु विलासिता नभई बाध्यता भएको बताए।
थापाले निजी क्षेत्रलाई देशको शिक्षा र स्वास्थ्य प्रणालीको अभिन्न साझेदारका रूपमा व्याख्या गर्दै सेवा प्रवाहमै अतिरिक्त कर वा शुल्कको भार थप्ने नीति समस्याको समाधान हुन नसक्ने धारणा व्यक्त गरे। उनका अनुसार समता शुल्क समानताको नीति नभई असमानतालाई थप बढावा दिने व्यवस्था थियो।
सरकारले आर्थिक तथा सामाजिक यथार्थलाई स्वीकार गर्दै उक्त व्यवस्था खारेज गरेको भन्दै थापाले निर्णय सही भएको प्रतिक्रिया दिएका छन्। उनले उक्त निर्णयलाई कार्यान्वयनमा लैजान आवश्यक कानुनी तथा प्रशासनिक प्रक्रिया पनि रीतपूर्वक पूरा गर्न सरकारसँग आग्रह गरेका छन्।
यसैगरी, थापाले सरकारले बिजुलीमा लगाइएको भ्याटलगायत अन्य अव्यावहारिक कर तथा नीतिगत त्रुटिहरू पनि सच्याउँदै आमनागरिकको भावना र आवश्यकतालाई सम्बोधन गर्नुपर्ने बताएका छन्।
