काठमाडौँ । ओस्कार अवार्ड विजेता संगीतकार एआर रहमान र उनकी श्रीमती सायरा बानो करिब तीन दशकको वैवाहिक जीवनपछि अलग हुँदैछन् ।
सायराकी वकिल वन्दना शाहले एक आधिकारिक विज्ञप्ति जारी गर्दै दम्पतीको सम्बन्धविच्छेदको घोषणासहित गोपनीयताको माग गरेकी छिन् ।
त्यसको केही समयपछि एआर रहमानले पनि सामाजिक सञ्जालमा एक भावुक नोट शेयर गरेर यसको पुष्टि गरेका छन् ।
२७ वर्षको उमेरमा एआर रहमानले १२ मार्च १९९५ मा सायरासँग विवाह गरे । सायरा त्यतिबेला २१ वर्षकी थिइन् । यो एआर रहमानकी आमाद्वारा व्यवस्थित विवाह थियो । दुवैका दुई छोरी खतिजा, रहिमा र एक छोरा अमिन छन् ।
सायरा बानोको जन्म २० डिसेम्बर १९७३ मा गुजरातको कच्छमा भएको थियो । कच्छबाट प्रारम्भिक पढाइ पूरा गरेपछि सायराको परिवार चेन्नई आएर बस्न थाले ।
एआर रहमानले अन्तर्वार्तामा भनेका थिए कि सायरासँग उनको पहिलो भेट ६ जनवरी १९९५ मा उनको २८ औं जन्मदिनमा भएको थियो ।
एआर रहमानलाई जन्मदिनको शुभकामना दिन सायराको परिवार त्यस दिन आएको थियो । त्यसपछि दुवै जना फोनमा कुरा गर्न थाले ।
