काठमाण्डौं । नेपाली कांग्रेसका सह महामन्त्री एवं पूर्व परराष्ट्रमन्त्री डा. प्रकाशशरण महतले बर्तमान ओली सरकारले आफ्नो निहीत स्वार्थ र पार्टीको आन्तरिक झगडामा देशलाई ठूलो आर्थिक तथा राजनीतिक खाडलमा हालेको बताएका छन् ।
उनले भने वर्तमान कम्युनिष्ट सरकार देश चकनाचुर बनाउने तर्फ उद्धत रहेकोले कांग्रेस चुप लागेर नबस्ने चेतावनी दिए । उनले लोकतन्त्रवादी शक्ति मिलेर वर्तमान ओली सरकारको भण्डाफोर गर्नुपर्नेमा पनि जोड दिएका छन् ।
हठात् प्रतिनिधिसभा बिघटन गरिएको विरोधमा आज कांग्रेसले महाराजगञ्ज चक्रपथमा आयोजना गरेको बिरोध सभामा डा. महतले सरकारले संविधान मास्ने काम गरेर देश संकटमा परेकोले लोकतन्त्रवादी शक्ति एकजुट हुनुपर्ने आबश्यकता औल्याए ।
सहमहामन्त्री डा महतले देशलाई पहिला भ्रष्टाचारको दलदलमा फसेकोले समस्याग्रस्त राजनीतिलाई कांग्रेसले नै सहि बाटोमा ल्याउने दृढता पनि ब्यक्त गरे । डा. महतले सवर्सत्तावादको बिरोधमा देशैभर कांग्रेस सडकमा आएको पनि उनले बताए ।
उनले प्रतिनिधि सभा पुनस्थार्पना भए दुइ बर्षपछि र बिघटनलाई नै अदालतले सदर गरे तुरुन्तै निर्वाचनमा होमिन पनि कार्यकर्ताहरुलाई निर्देशन दिए । उनले भने काँग्रेस देशका समग्र प्रजातन्त्रवादीहरुको पार्टी हो, निर्वाचनमा जान डराउँदैन ।
