काठमाडाैँ । नेपाली कांग्रेसको १५औँ महाधिवेशनअन्तर्गत केन्द्रीय पदाधिकारीका लागि भइरहेको मतगणनामा उपसभापति (खुला) तर्फ डा. चन्द्रकान्त भण्डारी र महामन्त्री (खुला) तर्फ प्रदीप पौडेलले अग्रता लिनुभएको छ ।
उपलब्ध मतगणनाको विवरणअनुसार उपसभापति (खुला) तर्फ डा. भण्डारीले १ हजार ६८६ मत प्राप्त गर्नुभएको छ । उहाँका प्रतिस्पर्धी ई. मधु आचार्यले १ हजार ९० मत प्राप्त गर्दा सुरेन्द्रराज पाण्डेले ९५५, गोविन्द भट्टराईले ९४१, धनराज गुरुङले ७१९, दीपक गिरीले ४९७ र प्रा. डा. चन्द्रमोहन यादवले २९९ मत प्राप्त गर्नुभएको छ ।
उपसभापति (समावेशी) तर्फ बिनोद कुमार चौधरीले ८९६ मतसहित अग्रता लिनुभएको छ । जीवन परियारले ८२९, फरमुल्लाह मंसुरले ४६९, रंजीत कर्णले २७० र सीता गुरुङले २५१ मत प्राप्त गर्नुभएको छ ।
त्यस्तै, महामन्त्री (खुला) तर्फ प्रदीप पौडेलले सर्वाधिक २ हजार ५५ मत प्राप्त गर्नुभएको छ । उदयशमशेर राणाले १ हजार १५९, डा. सुनिलकुमार शर्माले ९३४, अमरसिंह पुन मगरले ८१९, गुरुराज घिमिरेले ६७८, नैनसिंह महरले ४२८, शंकर तिवारीले ८२ र डा. सन्तोष उपाध्यायले ४९ मत प्राप्त गर्नुभएको छ ।
महामन्त्री (महिला) तर्फ डा. डिला संग्रौला (पन्त) ले १ हजार ५१७ मत प्राप्त गर्दै अग्रता लिनुभएको छ । महालक्ष्मी उपाध्याय (डिना) ले १ हजार ३९८ र रीता खनालले ३६५ मत प्राप्त गर्नुभएको छ ।
उपलब्ध विवरणअनुसार चारवटै समूहमा मतगणना जारी रहँदा सम्बन्धित पदका उम्मेदवारबीच प्रतिस्पर्धा देखिएको छ । मतगणनाको अन्तिम परिणाम भने सार्वजनिक हुन बाँकी छ ।
