एजेन्सी । जर्मनीका एक ६२ वर्षीय पुरुषले आफूले २०० भन्दा बढी पटक कोभिड–१९ को खोप लगाएको दाबी गरेका छन् । यो सुनेर वैज्ञानिकहरु अचम्ममा परेका छन् र अहिले उनको रोग प्रतिरोधात्मक क्षमताको अनुसन्धान गरिरहेका छन् ।
ल्यान्सेट संक्रामक रोग जर्नलमा प्रकाशित एक अध्ययनले बारम्बार खोप लगाउँदाको प्रभावको जाँच गर्यो ।
यस अध्ययनमा संलग्न एक ६२ वर्षीय जर्मन पुरुषले आफूले २१७ पटक कोभिड–१९ को खोप लगाएको दाबी गरेका छन् । तर, यो संख्या अहिलेसम्म पुष्टि भएको छैन । धेरै पटक भ्याक्सिन लिएपछि पनि व्यक्तिको रोग प्रतिरोधात्मक क्षमता बढेको र शरीरमा एन्टिबडी उत्पादन भइरहेको वैज्ञानिकहरूले पत्ता लगाएका छन् ।
स्थानीय समाचारमा खबर सुनेपछि, म्युनिख, भियना र फ्रेडरिक-अलेक्जेन्डर-विश्वविद्यालय एर्लान्जेन-नुरेम्बर्गका अस्पतालका डाक्टरहरूले यस विषयमा जानकारी लिन प्रयास गरे । उनीहरुले उक्त व्यक्तिलाई सम्पर्क गरी अनुसन्धानका लागि बोलाए, जसमा उनी सहमत भए ।
प्रोफेसर किलियन स्कोबरले भने, ‘हामीले अखबारमा पढेर यी व्यक्तिको बारेमा थाहा पायौं । त्यसपछि हामीले उनलाई सम्पर्क गर्यौं र परीक्षणको शृङ्खलाका लागि एर्लान्जेनमा निम्तो दियौं । उनी यसमा धेरै चासो राखे ।’ डा. शोबर र उनका सहकर्मीहरू यस्ता बारम्बार खोपको नतिजा के होला भनेर जान्न चाहन्थे ।
खोपहरूमा सामान्यतया रोग उत्पन्न गर्ने जीवका भागहरू वा व्यक्तिको आफ्नै कोषहरूले बनाउन सक्ने संरचना समावेश हुन्छ । यी एन्टिजेन्सका कारण, शरीरको प्रतिरक्षा प्रणालीले वास्तविक रोग उत्पन्न गर्ने जीवलाई चिन्न सिक्छ । त्यसपछि यो रोगविरुद्ध छिटो र बलियो रुपमा लड्न सक्छ । तर के हुन्छ जब शरीरको प्रतिरक्षा प्रणाली बारम्बार एउटै एन्टिजनको सम्पर्कमा आउँछ ?
