काठमाडौं: राष्ट्रिय प्रजातन्त्र पार्टी (राप्रपा) ले सुनसरीको देवानगञ्ज गाउँपालिका–३, कप्तानगञ्जमा भएको हिंसात्मक घटनाप्रति गम्भीर चिन्ता व्यक्त गर्दै निष्पक्ष र स्वतन्त्र छानबिनको माग गरेको छ।
राप्रपा अध्यक्ष राजेन्द्र लिङ्देनले जारी गरेको विज्ञप्तिमा घटनामा ज्यान गुमाउने युवाप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेका छन्। साथै, घाइतेहरूको शीघ्र स्वास्थ्यलाभको कामना गर्दै उनीहरूको प्रभावकारी उपचारको व्यवस्था गर्न सरकारसँग आग्रह गरेका छन्।
राप्रपाले मृतकका परिवारलाई उचित राहत, क्षतिपूर्ति र न्याय सुनिश्चित गर्न तथा घाइतेहरूको निःशुल्क र गुणस्तरीय उपचारको तत्काल व्यवस्था गर्न माग गरेको छ।
पार्टीले घटनाको सत्यतथ्य पत्ता लगाउन निष्पक्ष, स्वतन्त्र र पारदर्शी छानबिन आवश्यक रहेको बताउँदै हिंसा भड्काउने, हत्या, आगजनी वा सामाजिक सद्भाव खलल पार्ने जोसुकैलाई कानुनअनुसार कडा कारबाही गर्नुपर्ने धारणा राखेको छ।
राप्रपाले तराई–मधेसका विभिन्न क्षेत्रमा चाडपर्व तथा धार्मिक अवसरका बेला पटक–पटक तनाव र हिंसात्मक घटना दोहोरिनु चिन्ताजनक भएको जनाएको छ। धार्मिक संवेदनशीलतासँग जोडिएका घटनाको कारण, पृष्ठभूमि, सुरक्षा कमजोरी र प्रशासनिक जिम्मेवारीबारे गहिरो अध्ययन गरी दीर्घकालीन समाधान खोज्न सरकारलाई आग्रह गरेको छ।
पार्टीले यस्ता घटना रोक्न सर्वपक्षीय समिति गठन गरी तत्काल संवादको पहल गर्नुपर्ने बताएको छ। प्रत्येक नेपालीले संविधान र कानुनले दिएको अधिकारअनुसार आफ्नो धर्म, संस्कृति र परम्परा निर्भयपूर्वक अभ्यास गर्न पाउने वातावरण राज्यले सुनिश्चित गर्नुपर्ने राप्रपाको भनाइ छ।
राप्रपाले हिंसा, अराजकता र साम्प्रदायिक द्वेषको राजनीति स्वीकार्य नभएको उल्लेख गर्दै सामाजिक सद्भाव, राष्ट्रिय एकता र नागरिक सुरक्षाका लागि आवश्यक कदम चाल्न सरकारसँग पुनः आग्रह गरेको छ। साथै, संवेदनशील परिस्थितिमा संयमता अपनाउन आम नागरिकलाई अपिल गरेको छ।
