सुनसरी । जिल्ला प्रशासन कार्यालय सुनसरीले जिल्लाका केही क्षेत्रमा अनिश्चितकालीन कर्फ्यू आदेश जारी गरेको छ । प्रमुख जिल्ला अधिकारी ईश्वरी प्रसाद अर्यालले स्थानीय प्रशासन ऐन, २०२८ को दफा ६ (क) बमोजिम बुधबार दिउँसो ३ः३० बजेदेखि अर्को सूचना जारी नभएसम्मका लागि कर्फ्यू आदेश जारी गर्नुभएको हो ।
प्रशासनले महेन्द्र राजमार्गअन्तर्गत पकली चोकदेखि पश्चिम कोशी ब्यारेजको पुलसम्मको क्षेत्र र इनरुवा बजार क्षेत्रको सीमाभित्र कर्फ्यू लागू हुने जनाएको छ ।
कर्फ्यू लागू भएको क्षेत्रमा कसैलाई आवतजावत गर्न तथा कुनै पनि प्रकारको भेला, जुलुस, प्रदर्शन, सभा, बैठक र घेराउ गर्न निषेध गरिएको जिल्ला प्रशासन कार्यालय सुनसरीले जनाएको छ ।
कर्फ्यूको सीमा पूर्वमा पकली चोकसम्म, पश्चिममा कोशी ब्यारेजको पुलसम्म तथा उत्तर र दक्षिणतर्फ महेन्द्र राजमार्गदेखि २०० मिटर क्षेत्रसम्म तोकिएको छ ।
जिल्ला प्रशासन कार्यालयले आदेशको पालना गर्न सम्बन्धित सबैमा अनुरोध गरेको छ ।
