एजेन्सी । इंग्लिस प्रिमियर लिग फुटबल अन्तर्गत शीर्षस्थानको आर्सनलले रोमाञ्चक जित निकालेको छ ।
शनिबार राति भएको खेलमा आर्सनलले बर्नमाउथलाई ३–२ गोलले पराजित गरेको हो । घरेलु मैदानमा २–० गोलले पछि परेको आर्सनल नतिजा उल्ट्याएर जित निकाल्यो ।
आर्सनललाई जित दिलाउन थोमस पार्टे, बेन ह्वाइट र रेइस नेल्सनले गोल गरे । आर्सनलले सबै गोल दोस्रो हाफमा गरेको थियो । यता बर्नमाउथका लागि फिल बिलिङ र मार्कोस सेनेसीले गोल गर्दा एक समय पाहुना टोलीले शीर्षस्थानको आर्सनललाई निकै दबाबमा पारेको थियो ।
खेलको सुरुवातमै अर्थात् ९ सेकेन्डमै बिलिङले गोल गर्दै बर्नमाउथलाई सुरुवाती अग्रता दिलाए । यो गोल प्रिमियर लिग इतिहासकै दोस्रो सबैभन्दा छिटो गोल पनि बन्यो । यस्तै, ५७ औं मिनेटमा आर्सनलले अर्को गोल खान पुग्यो । सेनेसीले हेडमार्फत गोल गरे ।
६२ औं मिनेटमा पार्टेले गोल गर्दै आर्सनललाई खेलमा फर्काए । कर्नरबाट आएको बललाई स्मिथ रोएले हेड गर्दै गोल गर्ने प्रयास गरेका थिए । यता अनमार्कमा रहेका पार्टेले सहजै गोल गरे । त्यसपछि ७० औं मिनेटमा बेन ह्वाइटले गोल गर्दै आर्सनललाई २–२ को बराबरीमा ल्याए ।
आर्सनलले अन्तिम समयमा, अन्तिम मिनेटमा गोल गर्दै अविस्मरणीय जित निकाल्यो । ९७ औं मिनेटमा आर्सनलका कप्तान मार्टिन ओडेगार्डले कर्नर प्रहार गरे । बर्नमाउथका सेनेसीले उक्त कर्नरको बललाई हेड गर्दै क्लियर गर्न खोजे । तर नेल्सनले बललाई छातीले नियन्त्रण गर्दै सशक्त प्रहार गरे । उक्त बल गोलमा परिणत भयो ।
जितसँगै २६ खेलबाट ६३ अंकसहित आर्सनल शीर्षस्थानमा यथावत छ । पराजित बर्नमाउथ २५ खेलबाट २१ अंकसहित तालिकाको पुछारमा रहेको छ । यस्तै दोस्रो स्थानको सिटीको २६ खेलबाटै ५८ अंक छ ।
