काठमाडौँ । सुनसरीमा जारी रहेको हिंसात्मक झडप लगायतका विषयमा छलफल गर्न राष्ट्रिय स्वतन्त्र पार्टीका सभापति रवि लामिछानेले भोलि बिहान ८ बजे सिंहदरबारमा सर्वदलीय बैठक आह्वान गरेका छन् ।
भोलि बिहान ८ बजे सिंहदरबारस्थित सार्वजनिक लेखा समितिको बैठक कक्षमा सो बैठक बस्ने गरी आह्वान गरिएको छ । उक्त बैठकमा छलफलका लागि संसदमा रहेका सबै दलसहित मधेशी नेताहरु उपेन्द्र यादव, महन्थ ठाकुर, सीके राउतलाई पनि आमन्त्रण गरिएको छ ।
सभापतिको सचिवालयका अनुसार सो बैठकका लागि संसदमा प्रतिनिधित्व गर्ने दललाई पत्राचार गरिएको छ । सभापति लामिछानेले नेताहरूलाई आफैँ फोन गरेर बैठकमा आमन्त्रण गरेको उनको सचिवालयले जनाएको छ ।
अत्यन्तै संवेदनशील र दुःखद घटना तथा त्यसले निम्त्याएको असहज अवस्थामा सामाजिक रुपमा फैलन सक्ने द्वेष न्यूनीकरण गरी सद्भाव र शान्ति सुरक्षा कायम गर्न प्रशासनिक प्रयास जारी रहँदा राजनीतिक रुपमा पनि सामुहिक सन्देश र अपीलको आवश्यकता बोध भएकाले छलफल आयोजना गरिएको रास्वपाका महामन्त्री विपिन आचार्यले जानकारी दिए ।
सुनसरीमा सुरु भएको झडप थप हिंसात्मक हुँदै गएको बताइएको छ । आज मंगलबार पनि त्यहाँ झडपहरु जारी नै रहेको र यसक्रममा थप केही व्यक्ति घाइते भएको हुनसक्ने पनि अनुमान गरिएको छ ।
