काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले संसद्मा प्रभावकारी भूमिका निर्वाह गर्न आफ्ना पार्टीका सांसदहरूलाई निर्देशन दिनुभएको छ ।
रास्वपा संसदीय दलको बैठकमा उपप्रधानमन्त्री एवं गृहमन्त्रीसमेत रहनुभएका पार्टी अध्यक्ष लामिछानेले सांसदहरुलाई संसदीय बैठकमा जनताले दिएको जिम्मेबारी पूरा गर्नका लागि लाग्न निर्देशन दिनुभयो ।
रास्वपा आफैँ पनि सत्ता साझेदार दल भएकाले प्रधानमन्त्री पुष्पकमल दाहाल प्रचण्डलाई विश्वासको मत दिन अन्य दललाई पनि आग्रह गरिने उहाँको भनाइ थियो । उहाँले पार्टी नै सरकारमा रहेकाले विश्वासको मत दिनका लागि आफ्ना पार्टीका सांसदहरुलाई ह्विप लगाउन आवश्यक नपर्ने भन्दै त्यो सांसदहरुको जिम्मेबारी भएको बताउनुभयो ।
