एजेन्सी । इंग्ल्यान्डले आईसीसी टी–ट्वान्टी पुरुष विश्वकप फुटबलको सेमिफाइनलमा स्थान बनाएको छ ।
सिड्नीमा शनिबार भएको खेलमा श्रीलंकालाई ४ विकेटले हराउँदै इंग्ल्यान्ड अन्तिम चारमा प्रवेश गरेको हो । श्रीलंकाले दिएको १ सय ४२ रनको लक्ष्य इंग्ल्यान्डले १९ ओभर ४ बलमा ६ विकेटको क्षतिमा १ सय ४४ रन जोड्दै पूरा गर्यो ।
इंग्ल्यान्डका लागि एलेक्स हालेसले ४७ रनको योगदान दिए । यस्तै बेन स्टोक्सले अविजित रहदै ४२ रन बनाए भने कप्तान जोस बट्लरले २३ रन जोडे ।
श्रीलंकाका लाहिरु कुमार, धनन्जय डी सिल्भा र वानिन्दु हसरंगा डी सिल्भाले २–२ विकेट लिए । त्यसअघि पहिले ब्याटिङ गरेको श्रीलंकाले २० ओभरमा ८ विकेट गुमाएर १ सय ४१ रन बनाएको थियो ।
श्रीलंकाका लागि पाथुम निसन्काले ६७ रनको अर्धशतकीय इनिङ खेले । भानुका राजपाक्षेले २२ तथा कुशल मेन्डिसले १८ रन जोडे ।
इंग्ल्यान्डका मार्क उडले ३ विकेट लिए ।
जितसँगै इंग्ल्यान्डले समूह १ बाट दोस्रो स्थानमा रहेर सेमिफाइनलमा स्थान बनाएको हो । इंग्ल्यान्डले ५ खेलमा ७ अंक जोड्यो ।
यस समूहबाट न्युजिल्याण्ड ७ अंक जोडेर शीर्ष स्थानमा रहदै अन्तिम चारमा पुग्यो भने इंग्ल्यान्डको जितसँगै साविक विजेता अष्ट्रेलिया प्रतियोगिताबाट बाहिरियो ।
श्रीलंकाले जितेको खण्डमा अष्ट्रेलिया अन्तिम चारमा पुग्ने थियो । तर अष्ट्रेलियाले ७ अंक जोडेपनि नेट रन रेटमा पछि परेपछि सेमिफाइनलमा पुग्न पाएन ।
