काठमाडौँ। प्रमुख प्रतिपक्ष दल नेपाली काँग्रेसले सुनसरी लगायत पूर्वी तराईका जिल्लाहरुमा भएका घटनाहरूको निष्पक्ष र स्वतन्त्र न्यायिक छानबिन गर्न माग गरेको छ ।
सोमवार सिंहदरबारस्थित संसदीय दलको कार्यालयमा बसेको काँग्रेस संसदीय दलको बैठकले गृह मन्त्रालयद्वारा गठित छानबिन समितिलाई ‘कर्मकाण्डी’ संज्ञा दिँदै उच्चस्तरीय न्यायिक समिति गठन गर्नुपर्ने निर्णय गरेको हो ।
बैठकपछि सञ्चारकर्मीहरूसँग बोल्दै पार्टीका महामन्त्री प्रदीप पौडेलले सुनसरीमा दुई समुदायबीच भएको झडप र सुनसरी तथा सिरहामा गरी तीन जनाको मृत्यु भएको घटनालाई पार्टीले गम्भीरताका साथ लिएको बताउनु भयो ।
काँग्रेसले यस विषयलाई प्रतिनिधि सभा र राष्ट्रिय सभा दुवै सदनमा सशक्त रूपमा उठाउने र न्यायिक समिति निर्माणका लागि सरकारलाई दबाब दिने निर्णय गरेको छ ।
यस प्रक्रियामा अन्य विपक्षी दलहरूसँग पनि सहकार्य र समन्वय गरिने महामन्त्री पौडेलले बताउनु भयो । नागरिकका मुद्दा र आवाजलाई संसदसम्म प्रभावकारी रूपमा पु¥याउन नेपाली काँग्रेसले आफ्ना सांसदहरूलाई जिल्लागत जिम्मेवारी तोक्ने निर्णय गरेको छ ।
काँग्रेसको तर्फबाट प्रतिनिधित्व नभएका जिल्लाहरूमा समेत राष्ट्रिय सभा र प्रतिनिधि सभाका सांसदहरूलाई खटाई नागरिकसँग प्रत्यक्ष संवाद र समन्वय गर्ने संयन्त्र तयार पारिएको छ ।
महामन्त्री पौडेलले भन्नुभयो, ‘आजको नेपाली कांग्रेस संसदीय दलको बैठकले केही महत्त्वपूर्ण निर्णय गरेको छ । हालै सुनसरीमा भएको गम्भीर घटनाको छानबिन गृह मन्त्रालयले गठन गरेको समितिबाट सम्भव छैन भन्ने निष्कर्ष बैठकको छ ।
त्यसैले सत्यतथ्य सार्वजनिक गर्न र दोषीलाई कानुनबमोजिम कारबाही सुनिश्चित गर्न स्वतन्त्र, निष्पक्ष र न्यायिक छानबिन समिति गठन गर्नुपर्ने माग नेपाली काँग्रेसले प्रतिनिधि सभा र राष्ट्रिय सभामा सशक्त रूपमा उठाउने निर्णय गरेको छ । साथै, यस विषयमा अन्य विपक्षी दलहरूसँग पनि सहकार्य गरिनेछ ।
नागरिकका आवाज र मुद्दालाई प्रभावकारी रूपमा संसदमा पु¥याउने उद्देश्यले सांसदहरूलाई जिल्ला–जिल्लामा जिम्मेवारी तोकी नागरिकसँग प्रत्यक्ष समन्वय र अन्तरसंवाद गर्ने निर्णय गरिएको छ ।
सांसदका स्वकीय सचिव नियुक्तिका लागि स्पष्ट मापदण्ड तयार गरी सोही मापदण्डअनुसार नियुक्ति प्रक्रिया अघि बढाइने निर्णय भएको छ । यसका साथै, सांसदहरूको क्षमता र प्रभावकारिता अभिवृद्धिका लागि नेपाली काँग्रेसले आयोजना गर्ने एकदिने अभिमुखीकरण तथा संवाद कार्यक्रममा संसदीय दलको सहभागिता रहने निर्णय पनि गरिएको छ । यी विषयसहित समसामयिक राजनीतिक मुद्दामा आजको बैठकले आवश्यक निर्णय गरेको छ
बैठकले सांसदका स्वकीय सचिवहरूको नियुक्तिमा निश्चित मापदण्ड निर्धारण गर्ने र सोही आधारमा मात्र स्वकीय सचिव प्रश्ताव गर्ने निर्णय पनि गरेको छ । साथै, सांसदहरूको कार्यक्षमता र प्रभावकारिता अभिवृद्धि गर्न पार्टीका तर्फबाट एकदिवसीय अभिमुखीकरण तथा संवाद कार्यक्रम आयोजना गर्ने निर्णयलाई संसदीय दलले अनुमोदन गरेको छ । बैठकमा समसामयिक राजनीतिक विषय र संसदीय भुमिकालाई थप प्रभावकारी बनाउने सन्दर्भमा समेत छलफल भएको छ ।–न्युज एजेन्सी नेपाल
